Accessibility links

пәнҗешәмбе, 8 декабрь 2016, Казан вакыты 01:15

Bush: Törkiä-Ğiraq, Rusiä-İran häm başqa xalıqara mäsälälär turında


Çärşämbedä Quşma Ştatlar prezidentı George Bush Aq yortta jurnalistlarnı cıyıp matbuğat oçraşuı ütkärde. 45 minut däwam itkän bu oçraşu waqıtında ul törle xalıqara mäsälälärgä tuqtaldı.

Ni öçen Bush bu oçraşunı näq menä xäzer ütkärerde häm anda nindi mäsälälär kütärelde?

Şuşı könnärdä genä xalıqara säxnädä berniçä möxim waqiğa buldı. Äytik, sişämbedä Tähranda Kaspi illäre sammitı ütte häm anıñ qısalarında Rusiä prezidentı Vladimir Putin İran prezidentı Mäxmüt Äxmädinecad belän oçraştı. Çärşämbedä Törkiä parlamentı Tönyaq Ğiraqqa kördlärgä qarşı ğäskär kertü mäsläsen tikşerde häm nigezdä bu ğämälne röxsät itkän qarar qabul itte. Küräseñ, amerikan prezidentı bu waqiğalardan çittä qala almağan.

Törkiäneñ kördlärgä qarşı Ğiraqqa ğäskär cibärü niätenä Buş niçek qarıy?

Älbättä, tiskäre qarıy, Waşington, bu ğämäl Ğiraqtağı wağziätne tağı da qatlawlandıraçaq digän fikerdä.

"Ğiraqqa ğäskär cibärü Törkiäneñ mänfäğtendä tügel, bez alarğa bu turıda äyttek", dide Buş. Citmäsä anda Törkiäneñ küpmeder xärbie inde bar. Buş Ğiraq räsmiläre belän elemtädä toruın, häm vitse-premier Tariq äl-Haşimineñ xäzer İstanbulda törek räsmiläre belän söyläşülär alıp baruın äytte.

Şuşı könnärdä genä Kongressnıñ tışqı eşlär komitetı Ğosmanlı Törkiädä ärmän genotsidın tanığan qarar da qabul itte.

Äye, bu qarar da Amerika-Törkiä mönäsäbärlärendä kierenkelekkä säbäp buldı. Ankara xättä Waşingtondağı ilçesen çaqırtıp aldı. Bush üze bu qararğa qarşı häm deputatlarnı tarix belän şöğellänmäskä çaqıra. Äytkändäy, qayber kongressmennar inde fikerlären üzgärtä başlağan. Wäkillär pulatı bu mäsäläse kiläse ayda qararağa cıyına.

İnde İranğa kilsäk, Putinnıñ Äxmädinecad belän söyläşüläre turında Buş närsä äytte?

Menä bu turıda sorawğa cawap birgändä Buş beraz aptırağan kebek kürende. Putin Täranda çağında, bezdä İrannıñ atom qoral yasawına dälillär yuq, digän süzlär äytkän ide.

"Min äle ul söyläşülären eçtälege belän tanışmadım. Avstraliädä küreşkändä prezident Putin miña İran atom qoralına iä bulmasqa tieş digän ide. Minem şunı beläsem kilä, anıñ bu borçuları äle dä köçendäme, dide Bush.

Amerikan prezidentı İranğa basım yasaw säyäsäten däwam itergä çaqırdı. Anıñ fikerençä, İran xalqı bu çikläwlärdän arı, axır çiktä üz citäkçelegen alıştıraçaq.

İranğa atom qoralına iä buluğa yul quymawnı ul iñ möxim äyber, xättä 3 nçe dönya suğışın buldırmıy qalu çarası, dip atadı.

Bu maqsatqa ireşü öçen, bar çaralar küreläçäk, dide ul. Alay da üzeneñ diplomatik çaralarnı xubraq kürüen iskärtte.

ali ğilmi
XS
SM
MD
LG