Accessibility links

дүшәмбе, 5 декабрь 2016, Казан вакыты 05:26

Polşada oppozitsiä ciñde – säyäsättä nindi üzgäreşlär kötelä?


Yäkşämbedä Polşada ütkän parlament saylawlarında ciñüne oppozitsiädäge Watandaşlar Platforması yawlağan. Cıyğan tawışları 50%-qa citmäsä dä bu partiä sulçılar yä igençelär firqäse belän berläşep koalitsion xökümät tözi ala. Premier-ministr Yaroslav Kaczynskinıñ Qanun wä Ğädellek partiäse ciñelüen tanıdı. Polşada xakimiät alışınuı nindi üzgäreşlärgä kiterä ala?

Polşadada ütkän parlament saylawlarnıñ räsmi näticäläre sişämbedä genä iğlan iteläçäk. Ämmä premier-ministr üzeneñ ciñelüen inde tanıdı:

"Bez Polşanı şaqtıy üzgärttek, läkin yartı yulda tuqtap qaldıq. Asılda üzebez tuqtadıq. Ägär prinsiplarıbızdan baş tartqan bulsaq, bälki xakimiättä qalğan bulır idek. Monı eşläw ciñel ide, bu turıda bälki ber yazırmın äle. Läkin bez qağidälärne bozmadıq häm moña ükenmibez, çönki prinsiplarnı bozırğa yaramıy" dide Yaroslav Kaçinski.

Watandaşlar Platforması çitäkçese 50 yäşlek Donald Tusk üzeneñ çiñüen iğlan itte:

"21 üktäber könne üzläre öçen yaxşıraq yazmış saylarğa barğan härkemgä räxmät belderäsem kilä. Küp atnalar buyına bez polyaklarnı yaxşıraq yäşäp bula, polyaklar yaxşıraq xökümätkä, yaxşıraq tormışqa layıqlı, dip ışandırıp kildek" dide Donald Tusk.

Salımnar kimetergä häm Yewropa Belrege belän tığızraq mönäsäbätlär urnaştırırğa wäğdä itkän Watandaşlar Platforması tawışlarnıñ 40-tan kübräk protsentın cıyıp berençe urınnı alğan. Yağni, Donald Tuskqa xökümät tözü öçen kem beländer, yä 3-nçe urınnı alğın sulçılar, yä 4-nçe urınnı alğan krästiännär partiäse belän berläşergä turı kiläçäk.

Premier ministr Yaroslav Kaçinski citäklägän häm 2nçe urınnı yawlağan Xoquq häm Ğädellek partiäse xäzer oppozitsiägä küçäçäk dip kötelä.

Xakimiättäge şuşı alışınular Polşa säyäsätenä nindi üzgäreş alıp kiler?

"Üzgäreşlär bulaçaq: Polşa säyäsäteneñ cisemendä dä, räweşendä dä. Räweşkä kilgändä, Yaroslav Kaçinski xökümätenä xas usal täqqäberlek kimergä tieş" di Warşawdağı Stafan Batory isemendäge fond wäkile Aleksandr Smolar.

Cisemgä kilgändä, Watandaşlar platforması saylaw aldı kompaniäse waqıtında polyak xärbilären Ğiraqtan qaytarırğa, Quşma Ştatlarnıñ Polşada raketa qalqanı urnaştıru mäsäläsendä qatıraq torırğa wäğdä itkän ide.

Ämmä Smolar fikerençä, bu wäğdälärne ütärgä ciñel bulmayaçaq. Çönki igezäk Kaçinskilarnıñ premier bulğanı kitsä dä, prezident bulğanı äle qala:

"Prezidnetnıñ täqdim itelgän qanunğa veto salu xoquqı bar. Bu vetonı ütü öçen parlamentta tawışlarnıñ 5-tän 3-en cıyarğa kiräk. Yaña xökümätneñ ul qädäre tawışı bulmayaçaq. Bu oçraqta ul sulçılar belän xezmättäşlek itergä mäcbür bulaçaq" di säyäsät belgeçe Aleksandr Smolar.

Şulay itep, Polşada igezäk Kaçinskilarnıñ xakimiät monopoliäse bette. Prezident Lex Kaşinskiğa xäzer üzeneñ tuğanı belän tügel, ä oppozitsiädäge xökümät belän eşlärgä turı kiläçäk.

Kiläse prezident saylawları 2010 yılda kötelä.

ali ğilmi
XS
SM
MD
LG