Accessibility links

Кайнар хәбәр

"Bögelmägä säyäxät": Praga teatrı Bögelmägä çaqıra


3nçe dönya suğışı....dönyanı terrorçılar basqan. Rusiädä ber çex ğailäse - babası, ulı häm onığı suğıştan qaçırğa dip Bögelmä digän ber cirne ezli.

Bögelmä ul – xıyaldağı imin häm tınıç urın...alarnıñ äniläre qayçandır Rusiägä Stalin lagerları kebek ber cirgä kitkän bulğan. Änilären tabıp soñınnan bu ğailä bergä Bögelmägä aşığa... İrlär adaşa adaşa säfärlären däwam itkän arada babaları ülep kitä. Ul arada lagerda çex xanımı alman xanımı belän bergä mäyetlärne çistartıp, yaraların tegep alardan zombilar yasıy. Şul arada tormışları turında söyläşä.

Tamaşada säyäsät, cämğiät, xatın-qızlar xälläre yaqtırtıla... Yevropanıñ elekke häm bügenge äğzaläre turında bäxäs – ike xatın-qız awızınnan çığa... Berlek üzenä yaña äğzalärne qabul itsä dä elekke Yevropada, anıñ könbatış öleşendä üzlären östenräk totu häm monı açıq itep kürsätü däwam itä...Yevropanıñ könçığışında isä – belem citmäw, tarqawlıq häm üz yazmışlarına bitaraflıq xökem sörä.

"Bögelmägä säyäxät" äsäre avtorı yazuçı Jachym Topol, çex radiosına birgän äñgmäsendä cämğiätlär arasındağı bu qarşı torunı menä niçek añlattı:

"Qalıplaşqan cämğiätlär turında bu. Könçığış Yevropa xatın-qızı üz tormışın ire idarä itkän cämğiättä yäşi, ire anı tübänsetä häm qıynıy. Ämma üze ul tormışın mäğnäle itep sanıy, çönki ul yalğız tügel. İkençe xatın-qız Könbatıştan, belemle, irekle, anıñ aqçası bar. Şundıy uq iptäş qızları bar. Ämma ber mäldä – ul üzeneñ yalğız bulğanın añlıy. Sez inde xäzer alay tügel, dip äytersez. Min üzem dä aptıradım, andıy qalıplaşqan qaraşlar inde üzgärgänder dip sanıy idem. Ämma yuq, tamaşaçı, duslarım reaksiäsennän – yuq, bu ölkädä ällä ni üzgäreş bulmağanın kürdem."

Säyäsi temalardan – bayraq totqan amerikan xärbilären häm alarğa mönäsäbät, qotqarırğa kilgäç oçqıçnı kürgäç – bälägä yulıqqannarnıñ, "Putin, Putin, bezne Putin qotqaraçaq" dip qıçqırğannarın kürdek. Çexiädä barğan säyäsi häm iqtisadi reformalar, inde äytkänemçä – Yevropa Berlegenä häm konkret atap äytelgän säyäsätçelärgä täñqit – Praganıñ Na Zabradli teatrı säxnäsendä ber nindi qurqusız häm şiklänüsez yañğradı... Äsär inde äytkänemçä Bögelmägä säyäxät dip atala ide.... Suğıştan, açlıqtan häm terrordan bu keşelär Bögelmä digän tınıç räxät cirgä qaçıp qotılırğa teläde...Tamaşanı qarap çıqqaç xalıq belän aralaşqanda, Bögelmäneñ çınnan da şähär bulğanın belgän keşelärneñ bik az bulğanın kürdek.

-Uydırma ul

-Älbättä Bögelmä bar, Seberdä...anıñ turında Haşek ta yazğan

-Eye bar, däwlät ul Bögelmä

-Älbättä, nindider cir ul bezneñ planetada

-Qaydadır çınbarlıqtan yıraqta

-Ber kem dä belmi şul anıñ qayda ikänen, säxnädä bar, läkin kiläçäktä bulaçaq ul

-Belmim, çınnan da bar mikän, läkin minemçä eye bardır

-Bögelmä ul şähär, Tatarstanda, internettan qaradım

Şulay itep här keşeneñ üz Bögelmäse bar bu dönyada, şul sanda Tatarstannıñ da!

Çex yazuçısı Jachym Topolneñ "Bögelmägä säyäxät" isemle tamaşasın Germaniä häm Polşa säxnälärendä, alman häm polyak tellärendä kürep bula. Azatlıqta bu xaqta tapşırunı 27 üktäber şimbä könne tıñlağız.
XS
SM
MD
LG