Accessibility links

якшәмбе, 4 декабрь 2016, Казан вакыты 23:28

Бакчаларга чиратта 21 мең бала тора

  • гөлназ илгизәр

Бүгенге көндә Русиядә балалар бакчалары җитми, куп кенә төбәкләрдә меңләгән балалар бакчаларга урнашыр өчен чиратларда тора. Татарстанда мәктәпкә кадәр балалар өчен тәрбия учаклары белән хәлләр ничек соң?

Татарстанның мәгариф һәм фән министрлыгы мәгълүматләренә караганда, бүгенге көндә республикада 2 меңгә якын балалар бакчалары эшләп килә. Аларда план буенча тиеш булган 148 мең бала урынына 156 мең бала тәрбияләнә. Бу республикада бакчаларның саны кирәккә караганда азрак булу белән аңлатыла. Хәзерге көндә балалар бакчаларына чиратта 21 меңгә якын кеше тора. Һәм әлеге сан арта гына бара. Мәсәлән, 2005 ел белән чагыштырганда чират 5 мең балага үскән. Чөнки соңгы елларда бала табучылар саны артты, ә балалар саны азайган узган гасырның 90нчы елларында ябылган балалар бакчалары торгызылмый. Яңалары да бик аз төзелә. Былтыр мәсәлән нибары 280 кешелек 6 бакча ачылган. 2007 елда исә 4 балалар бакчасы эшли башлаган. Шуларның берсе – Казанда. Ләкин республика башкаласы өчен бу бик аз. Ник дисәң, нәкъ менә Казан бакчаларга урнашырга теләүчеләр саны буенча беренче урында торучы шәһәр. Казандагы балалар бакчалары, андагы чират хакында Азатлык тыңлаучыларына Казан шәһәре хакимияте мәгариф идәрәсенең баш белгече Роза Богданова сөйли.

Казанда хәзерге вакытта 285 балалар бакчасы эшләп килә, аларда 43 900 бала тәрбияләнә. Ләкин бүгенге көндә бакчаларга чират торучыларның саны да бик күп, алар инде 11 меңгә якынлаша. Хәер, аларның әле барысы да бүген үк бакчага барырга теләми. Ата-аналар зур чиратлар турында ишетеп, алдан ук, балалар әле кечкенә чагында ук балалар бакчаларына чиратка язылып куя. Ләкин балалар бакчаларында урын җитмәү проблемасы бар. Ул күбрәк шәһәрнең яңа районнарына хас. Анда йортлар күп, тиз төзелә. Ә бакчаларны ачып өлгермиләр. Шәһәр хакимияте бу проблеманы хәл итү өстендә эш алып бара. 2007 елда Казанда 6 балалар бакчасын ачу планга кертелгән иде. Шуларның берсе август аенда инде ачылды. Ноябрь, декабрьдә тагы берничәсе эшли башлаячак. Алар барысы да яңа түгел әлбәттә, кайсылары төзекләндерүдән соң ачыла. 2008 елда тагы 5 бакча эшли башларга тиеш.

Шәһәр хакимияте балалар бакчалары белән вәзгыятьне хәл итүдә аерым гамәлләр кыла. Ләкин алар барыбер җитәрлек түгел кебек. Чөнки шәһәрнең мәгариф идәрәләренә балалар бакчаларны чиратка басарга килүчеләрне һаман да, әлегә урыннар бөтенләй юк, кайчан буласы да билгесез, көтәргә кирәк, дип җибәрәләр. Мәсәлән, Казанның Вахитов районы мәгариф идәрасендә киләсе җәйсез бакчаларга юлламалар булмас, дип белдерделәр. Хәер, бу хакта ата-аналарга турыдан-туры әйтелсә дә, Азатлык өчен нинди дә булса аңлатмалар бирүдән баш тарттылар белгечләр.

Ата-аналар да әлеге мәсьәләдә бик ачылып сөйләшергә теләми. Исемнәрен әйтмәскә сорап, алар балалар бакчаларына юлламалары булган очракта да, анда урнашыр өчен шактый гына акча түләргә кирәклеге турында сөйли. Хәер, урнаштыру белән генә дә ата-аналардан акча таләп итү бетми. Еш кына уенчыклар алу, төзекләндерү өчен дә өстәмә акчаларны нәкъ менә ата-аналардан җыялар. Шулай итеп, Казанда балаларны бакчаларга урнаштыру мәсьәләсе әле шактый кискен тора. Мондый очракта әлбәттә теләгән бакчаны сайлап алу да кыенрак. Шуңа да карамастан, бик теләгәндә ата-аналар татар бакчасына балаларын бирә ала, ди Казан шәһәре хакимияте мәгариф идәрәсенең баш белгече Роза Богданова.

Бүгене көндә шәһәрдә 72 татар балалар бакчасы эшләп килә. Аларда 18 мең ала тәрбияләнә. 188 бакчада татар төркемнәре ачылган. Бу төркемнәр ата-аналарга һәм балаларга җайлырак булсын өчен, аларга ерак йөрмәскә, торган җирләре янындагы гына татарча тәрбияли торган бакчаларга йөртү мөмкинлеге булсын өчен ачылган. Алар Казанның һәр районында бар, теләгән ата-аналар ул төркем һәм бакчаларга балаларын илтә ала.

Дәүләт балалар бакчаларында финанслар белән дә, анда урнашу белән дә проблемалар шактый. Алай да, бездә нәкъ менә алар мәктәпкәчә тәрбия бирүче төп оешма булып торалар. Шәхси бакчалар булса да, алар күп түгел, анда йөрүчеләр дә әле әллә ни күп түгел Казанда.

Гөлназ Илгизәр

XS
SM
MD
LG