Accessibility links

шимбә, 3 декабрь 2016, Казан вакыты 05:42

Gruziädä berläşkän oppozitsiä kiläse közgä kiçekterelgän parlament saylawların yazın ütkärüne taläp itä


Comğa könne Gruziä başqalası Tiflistä Parlament binası qarşında prezident Mixail Saakaşviliğa qarşı uram cıyınına distälärçä meñ keşe kilde. Berläşkän oppozitsiä oyıştırğan bu çara Gruziädä näq 3 yıl elek başlanğan Gölçäçäk Inqilabınnan soñğı iñ zur külämle demonstratsiägä äwerelde. Töp taläp kiläse yazda parlament saylawları ütkärü. Başqa taläplär dä bar.

Comğadağı külämle uram cıyının oppozitsiäneñ sintäber ayında başlanğan rizasızlıq çaralarınıñ iñ yuğarı noqtası dip atarğa bula.

Ul rizasızlıq çaraları prezident Mixail Saakaşvilinı oppozitsiä wäkillären üterergä quşuda ğäyeplägän elekke saqlanu ministrı Irakli Okruaşvilinıñ qulğa alınuınnan soñ başlandı.

Korrupsiädä ğäyeplänep qulğa alınğan Okruaşvili isä 2 atnada cämäğätçelek aldında üze beldergän ğäyepläwlärne kire aldı häm äcätkä aqça qaldıru xisabına irekkä çığarıldı. Şunnan soñ Okruaşvili cämäğätçelekkä kürenmiçä öyendä genä torsa da, oppozitsiäneñ parlament saylawların bilgelängännän irtäräk ütkärü, Gruziäne parlament respublikası itü taläpläre köçäygännän köçäyä bara.

Comğa könge uram cıyınına Okruaşvili da kilergä mömkin digän süzlär taralğaç atnakiçtä anıñ advokatı Eka Beselia mondıy belderü belän çıqtı.

"Xäzer min şunı raslıy alam. Okruaşvili 2 noyäberdäge cıyınğa kiläse ide. Ul monı minem belän häm parlament äğzası Tero Tlaşadze belän oçraşuda äytte. Bu mäğlümät xakimiätlärgä dä barıp citkänme, yäki şiklängännärme? Uzğan töndä säğät 2-3lärdä Okruaşvili öyennän çığarğa mäcbür itelde, aña Fransiä ilçelegeneñ vizası quyılğan pasport tottırğannar. Qulğa alu belän yanap alar aña Gruziädän çitkä kitärgä quşqannar häm Fransiägä kitüçe oçqıçqa utırtqannar" dide Beselia.

Xökümät wäkilläre isä bu süzlärne kire qağıp Okruaşvili üze däwalanu öçen çitkä kitärgä teläde dilär. Räsmilär şulay uq demonstratsiäçelärneñ xakimiätlär bezneñ başqalağa kilü yullarıbızda törle kirtälär quya digän ğäyeplärlären dä kire qağa.

Gruziäneñ törle töbäklärennän Tifliskä pänceçämbe kiçendä ük cıyıla başlağan qayber demonstratsiäçelär başqalağa kilü yulları yabılğan, politsiä maşinalarnı tuqtada dip beldergän ide.

Prezident yaqlı Milli Xäräkät firqäse wäkile, parlamentnıñ täesirle äğzalarınnan berse Giga Bokeria bu cıyın aldınnan uq protest belderü xoquqı saqlanaçağın äytep quydı. "Gruziä demokratik il, monda mitinglar normal küreneş" dide Bokeria.

Cıyınnı Milli Şura digän blokka berläşkän distälägän keşkenä oppozitsion firqälär oyıştırdı. Ul Şurağa kergän firqälärneñ küpçelege parlamentta yuq. Häm alar bik törle säyäsi yaqlarnı wäkillek itälär. Anda populist firqälär, sulçı Xezmät Partiäse, Conservativ häm Respublika firqäläre dä bar.

Cıyında oppozitsiä citäkçese, elekke nizağlarnı çişü ministrı Giorgi Xaindrava jurnalistlarğa "Bez konstitutsiädä bilgelängänçä, kiläse yazda irekle, demokratik saylawlar ütkärüne taläp itäbez. Bez prezidentnıñ wazıyfasınnan kitüen taläp itmibez. Bez anıñ konstitutsiägä buysınuın taläp itäbez" dide.

Parlament saylawların prezident saylawları belän bergä turı kiterü öçen kiläse yılnıñ közenä kiçekterü turında qarar bıltır uq çıqqan ide. Ämma oppozitsiäneñ iğtibar üzägenä ul xäzer genä kütärelde.

Milli Şura parlament saylawları waqıtın küçerü konstitutsiäne bozu bulıp tora di.

Säyäsi küzätüçelär fikerençä, ğömümän alğanda Gruziädäge xäzerge protest dulqınnarı tirän säyäsi krizis buluın añlatmıy, Prezident Saakaşvilinı yaqlaw ildä äle haman da köçle. Şul uq waqıtta alar xökümät öçen wäzğiät nıq üzgärde häm xäzer anıñ kiñ külämle protest çaraları belän eş itü mömkinlege berençe märtäbä sınala di.
XS
SM
MD
LG