Accessibility links

җомга, 9 декабрь 2016, Казан вакыты 14:42

Söğüd Ğaräpstanı patşası Rim papası belän oçraştı


Bügen Vatikanda Söğüd Ğaräpstanı patşası Abdulla Rim papası Benedikt XVİnçı belän oçraştı. Rim katolik çirkäwe başlığınıñ söğüd patşası belän äle tarixta berençe oçraşuda süz möselman illärendä xristiannar xoquqları kebek mäsälädän alıp, ğömümän, xristiannar häm möselmannar arasındağı mönäsäbätlärne üsterü turında bardı.

Bu hiçşiksez tarixi oçraşu ide. Tarixta berençe tapqır bulğanı öçen genä tügel, ä möselmannarnıñ izge xac urınnarı – Mäkkä belän Mädinäneñ näq Abdullanıñ patşalığında bulğanı öçen tarixi, di "The Tablet" adlı Britan katolik jurnalınıñ Rimdağı xäbärçese Robert Mickens:

"Söğüd Ğaräpstanınıñ zurlığı, baylığı, qimmäte, Könbatış belän xezmättäşlege häm möselman illärenä yasağan yoğıntısı – bu säfärneñ – bik möhim säfär ikänen kürsätä."

Söyläşüdä iñ berençe möselman illärendä xristiannar xoquqları kütäreler dip farazlandı. Vatikan xristiannarnıñ xoquqları bozıluına borçılu belderep kilä. Rim katolik çirkäweneñ İslam eşläre wäkile kardinal Jean-Louis Tauran, uzğan ayda, Yevropada mäçetlär bulğanda, möselman illärendä çirkäwlär bulırğa tieş, dip beldergän ide.

Söğüd Ğaräpstanında 1 millionğa yaqın katoliklarnıñ başlığı Paul Hinder bu xällär belän yaqınnan tanış. Biredä xristiannarnıñ kübese - Aziä illärennän eşkä kilgän möhacirlär. Alarğa açıq itep üz dinnären totarğa irek birelmi.

Hinder süzlärenä qarağanda, iñ zur awırlıq – närsä röxsät itelgänen, ä närsä tıyılğanın tögäl belmäw. Bügen Vatikandağı oçraşuğa ul zur ömetlär bağlıy:

"Räsmi töstä, xristiannar üzara cıyıla ala, dielgän. Läkin niçä keşe cıyıla ala? Bu turıda äytelmi. Şulay uq alarnıñ qayda cıyıluı, kürşedä kemnär buluına bäyle. Qaywaqıt 100-200gä qadär keşe cıyıla ala. Urın imin bulmağanda, keşe azraq cıyıla."

Abdulla patşanıñ Rim papası belän oçraşuı ike din arasında mönäsäbätlärneñ äle genä caylana barğan çorına turı kilde..Berniçä atna elek dönyanıñ 130lap möselman ruxanie xristian din äxellärenä möräcäğät itep ike din arasında tınıçlıq häm añlaşuğa çaqırğan ide. Möselman din äxelläre bu xatqa cawap kötä. Şundıy uq möräcäğätne uzğan yıl Rim papasına 38 möselman ruxanie yullağan ide, aña cawap bulmadı. Şulay uq Rim papasınıñ Germaniägä bulğan säfäre waqıtında İslamnı köç qullanuğa tiñlägäne dä ike din arasında kierenkelek tudırğan ide. Şuña da Vatikanda uzğan bügenge söyläşülärne ike din wäkilläre häm dönya cämäğätçelege qızıqsınıp kötte.
XS
SM
MD
LG