Accessibility links

якшәмбе, 4 декабрь 2016, Казан вакыты 13:23

Prezident Saakaşvili ğinwar saylawlarına çığa alırlıq ixtimal köndäşlärennän arına


Gruziädäge qarşılıqlarnı kimetü maqsatında prezident Mixail Saakaşvili ğinwarda waqıtınnan alda prezident saylawları ütkärü turında färman çığarğan ide. Aña äzerlek inde şunda uq başlandı diärgä bula.

Tiflis uramnarı comğa könne tınıç ide - ildä haman da prezident tarafınnan kertelgän ğädättän tış xäl ğämäldä qala birä. Alay da başqala uramnarına ğädäti tormış inde kire qayta, politsiä elekke tösle çat sayın tügel, üzäk uramnarda maşinalar da, cäyäwlelär dä kübräk kürenä başladı. Prezidentnıñ ildä ğädättän tış xäl kertü färmanın comğa töştän soñ Gruziä parlamentı da rasladı, deputatlar monı bertawıştan qabul itte häm bu qırıs çaranıñ kiräklegen alar, prezident kebek ük, Rusiäneñ Gruziädäge xakimiätne bärep töşerü tırışlıqları belän añlattı. Ğädättän tış xälneñ äle haman da köçtä qaluı xäzerge waqıtta kübräk mäğlümät çaraları eşen çikläwdä genä çağıla, digän xäbärlär kilä Gruziä başqalasınnan.

İldäge qarşılıqlarnı kimetügä prezident Saakaşvilineñ kötmägändä, prezident saylawların waqıtınnan alda, ğinwar başlarında uq ütkärergä buluı da öleş kertte kebek. Monı ike kön elek kenä Tiflis uramnarına çıqqan oppozitsiäneñ dä zur öleşe xupladı. Ämma Saakaşvili belderüennän añlaşılğança, ul kiläse saylawlarda da ciñärgä ömetlänä, yäğni tawış birüne üz mandatın nığıtu öçen iğlan itä:

Mixail Saakaşvili süzlärenä qarağanda, başqa illär belän mönäsäbätlärdä tuğan problemalarnı xäl itü, Gruziägä yasalğan basımğa çıdaw, gruzin cirlären yolqıp alu tırışlıqlarına qarşı toru öçen aña bernindi dä şik uyatmaslıq yaqlaw kiräk.

Tawış birügä, ä ul ğinwarnıñ 5-enä bilgelängän, 45 kön qala Saakaşvili prezident urınınnan kitep, däwlät başlığı wazifaların parlament citäkçese Nino Burjanadzegä tapşırırğa tieş. Bu noyäbrneñ 22-endä bulaçaq. Burjanadze Saakaşvilineñ yaqın berektäşe sanala, şuña da saylawlarğa äzerlek çorında xakimiät yat qullarğa birelmi.

Ä inde Saakaşvilineñ prezident urını öçen kem belän yarışa alu mömkinleklärenä kilgändä, alar ällä ni zur tügel - oppozitsiäneñ berdäm nämzäte älegä yuq, bula alırlıqların da Saakaşvili tirälege uyınnan çığara bara.

Comğa könne Tiflistäge prokuratura şularnıñ bersen, kürenekle eşmäkär Badri Patarkatsişviline däwlät xakimiätenä qarşı fetnä oyıştıruda ğäyepläp çıqtı. Aña qädär oppozitsiäneñ tağın ike kürenekle wäkile - Şalva Natenaşvili häm Sötnä Gamsaxurdiä dä Rusiä faydasına küzläw alıp baruda, häm şulay uq xakimiätkä qarşı fetnä oyıştıruda ğäyeplängän ide.

Şulay itep, oppozitsiäneñ ömetle nämzäte älegä kürenmi. Ğomumän gruzin oppozitsiäseneñ alda torğan prezident saylawlarında berdäm nämzät tiräsendä tuplana aluı älegä bilgele tügel.

Kärim Kamal
XS
SM
MD
LG