Accessibility links

якшәмбе, 11 декабрь 2016, Казан вакыты 03:26

Rusiädä watandaşlıq alunı ciñeläytü tärtibe ozaytıla


Rusiä Däwlät Duması qayber törkemnärgä Rusiä watandaşlığın alu tärtiben ciñeläytü tärtiben tağın ber yılğa ozaytu turında qarar çığardı. Çärşämbe könne Duma bu qararnı beryulı 3 uqılışta qarap Federatsiä Şurasına tapşırdı. Qayber küzätüçelär bu qararnıñ maqsatı alda torğan Duma häm prezident saylawlarında xakimiätne yaqlawçılar sanın arttıru dip isäpli.

Elekke sovet respublikalarınnan çıqqan keşelärgä Rusiä watandaşlığın alunı ciñeläytü tärtibe tağın ber yılğa ozaytılırğa mömkin. Çärşämbe könne Duma iskitkeç zur tizlek belän, ber utıruda uq 3 uqılışta qarap Rusiä watandaşlığı turındağı qanunğa şundıy üzgäreşlär kertte. Ğämäldäge qanunda elek Sovetlar Berlege pasportına iä bulğan BDB häm Baltıyq illärendä yäşäwçelärgä Rusiä watandaşlığı 2008 yılnıñ 1 ğinwarına qädär genä ciñeläytelgän tärtiptä birelä. Yaña tözätmä isä anı 2009 yılnıñ 1 ğinwarına qädär ozaytunı küzdä tota.

Ciñeläytelgän tärtip eşne çınnan da ciñeläytä. Watandaşlıq alu öçen Federal Migratsiä xezmäteneñ cirle idaräsenä möräcäğät yazu, pasportnıñ küçermäsen, foto tapşıru häm poshlina tüläw citäçäk. Ciñeläytelmägän oçraqta isä başta waqıtlı yäşäw öçen röxsät alu, ber yıldan daimi yäşäw röxsäte alu, annan rus telennäm imtixan totu zarur, şunnan soñ ğına Rusiä watandaşlığın alu xoquqı birelä. Ämma ciñeläytelgän tärtip härkemgä dä qaramıy. Ul Sovetlar Berlege tarqalğanda bötenläy watandaşlıq ala almıy qaluçılarğa, atası yä anası Rusiä watandaşı bulğannarğa yäki 2002 yılnıñ 1 yülenä Rusiädä yäşägän urınnarında terkälüe bulğannarğa qarıy.

Şul uq waqıtta töbäklär üseşe ministrlığı Millätäşlär Intergratsiäse 2007 dip atalğan 2 könlek forum ütkärde. Anda gubernatorlar häm xökümät wäkilläre millättäşlärne tarixi watannarına yäğni Rusiägä qaytaru qıyınlıqları turında fiker alıştı. 2006 yılda çittäge millättäşlärne ilgä qaytaru demografik problemalarnı çişüneñ iñ näticäle yularınnan berse dip atalğan ide. Älegä monıñ ällä ni näticäse bulmasa da, qayber küzätüçelär fikerençä bu temanıñ ğämäli ähämiäte bik tä zur.

Mäsälän Gazeta basması BDB häm Baltıyq illärenä, şulay uq tanılmağan respublikalarda yäşäwçe millättäşlär Duma häm prezident saylawlarında gel aktiv qatnaşıp häm xakimiätlär faydasına tawış birep kilä. Mäsälän Dnestr buyında, Abxaziädä häm Könyaq Osetiädä yäşäwçe Rusiä pasportına iä bulğannar härçaq Rusiä saylawlarında aktiv qatnaşa häm Rusiä xakimiätlären yaqlıy. Dumada çärşämbe könne qabul itelgän üzgäreşne dä alar oşatır kebek. Bu üzgäreş alarnıñ tuğannarına da Rusiä watandaşlığı alu xoquqı birä.

Şul uq Gazeta basmasına Duma äğzası Viktor Alksnis "Bu qanunnıñ saylaw aldı wäzğiäte belän turıdan turı bäyläneşe bar, çönki näq menä bu saylawlarda xakimiätlärne ildän çittä yäşäwçe Rusiä watandaşlarınıñ tawışı qızıqsındıra, moñarçı mondıy ığı-zığınıñ bulğanı yuq ide äle" dip äytkän.

Ämma Dumanıñ ikençe ber äğzası Viktor Kuznetsov bu fiker belän kileşmi. Anıñça, qanunnı üzgärtü oçraqlı räweştä genä saylawlar belän ber çorğa turı kilgän, xäzerge ciñeläytelgän tärtip ay yarımnan ğämäldän çığa, şuña kürä anı aşığıç räweştä ozaytu zarur.

Dumada tawış birüdän soñ, 377 deputat tarafınnan xuplanğan tözätmä Federatsiä Şurasına cibärelde. Anda da ul xuplaw tabıp tiz arada prezident imzasın alır dip kötelä. Rusiä watandaşılın alunı ciñeläytü tärtibe 2 yıl elek näq prezident täqdime nigezendä ozaytılğan ide.
XS
SM
MD
LG