Accessibility links

якшәмбе, 4 декабрь 2016, Казан вакыты 19:26

Törkiä Tönyaq Ğıyraqqa ütep kermäskäme buldı?


Bu atnada da Törek mätbuğatınıñ kөn tärtibendä idän astı körd partizan oyışması PKK mäs’äläse bar ide. CNN-Türk isemle televiziä oyışması birgän mäğlümatlarga kürä, PKK-nıñ Ğıyraq belän İranda 24 xärbi bazası bar. Şuşı bazalarda tulayım ikemeñ PKK partizanı urnaşqan. PKK soñğı yılda 1 million da 800 meñ Amerikan dolları bäyäsendä RF, AQŞ, Qıtay, Macaristan häm Bolgaristannan qoral satıp alğan. Törkiäneñ üzendä isä öç meñ bişyöz PKK partizanı tawlarda yäşerenep, Tөrek Qorallı Kөçläre (TQK), imenlek köçlärenä, xätta sivillarğa qarata höcümnär oyıştıra.



Bu atna başında Kөnyaq Kөnçığışta Şırnak provinsiäsendäge Gabar, yaki Törekçä iseme belän Küpeli tawında TQK belän PKK partizannarı arasında barğan beryarım säğätlek bäreleşlärdä ber ofitser belän öç ğäskär ülde, tuğızı yaralandı häm şularnıñ ikeseneñ wazğiäte awır. Van provinsiäseneñ ber awılında da 7 sivil PKK tarafınnan orlandı.



Demokratik Cämğiät Partiäse-DTP-neñ parlamenttağı äğzalarınnan Fatma Kurtulan belän tağı ike DTP deputatına “PKK-ğa yardäm häm propaganda yasaw” ğäyebe belän prokuratura xökem protsessı başlatırğa äzerlänä. Alar ütkän atnada PKK-ğa äsir töşkän 8 törek ğäskären qotqaru öçen Tönyaq Ğıyraqtağı PKK bazasına bargannar ide. Millätçe Xäräkät Partiäse isä DTP-ne yabu kampaniäse başlattı. Läkin Premyer Erdoğan xalıqnıñ tawışı belän saylanğan deputatlarğa qarşı AK partiä şundıy ber adımnı raslamıy dip belderde. Ul ber ük waqıtta Tönyaq Ğıyraqqa ütep kerü operatsiäse dä yuq dide.Xärbi hava köçläre başkomandirı Babaoğlu da törek oçqıçları Tönyaq Ğıyraqqa kermäde dip belderde. Şulay uq AQŞ saqlanu ministerlege Pentagon da, törek mätbuğatında Tönyaq Ğıyraqqa törek xärbiläre ütep kerä başladılar digän xäbärlärne rastlamadı. Tönyaq Ğıyraqtağı Aftonom körd rayonu citäkçese Talibannıñ da “Törkiä belän kierenkelek bette” dip äytüe häm tışqı eşlär ministere Babacannıñ da “bez AQŞ belän PKK turındağı informatsiälärne urtaqlaşa başladıq “dip belderüe xärbi operatsiäneñ iñ kimendä kiçekterelgän buluın kürsätä.



Xökemätneñ PKK belän köräş mäs’äläsen il eçendä çişärgä, Tönyaq Ğıyraqtağılarnı da diplomatik häm ekonomik çaralar belän köçsezländerergä teläwen kürsätkän bilgelär arta başladı. Törkiä diplomatiä ölkäsendä Yaqın Könçığışta aktifraq rol uynıy da başladı. Bu atnada başta Suudi Ğäräbestan patşası Ğabdulla bin Ğabdülaziz el-Suudi Ankarağa ike könlek räsmi vizit yasadı. Ul da “Tönyaq Ğıyraqqa kermägez. Ğäräp illäre moña qarşı” dip äytte. Izrael prezidentı Şimon Perez belän Fälästin liderı Abbas Prezident Gülneñ insiativası belän Ankarada oçraştılar häm alar AQŞ-ta “Annapolis Tınıçlıq Konferentsisennän” elek qul qısıştılar. Alar ikese Törkiä Böyek Millät Mäclesendä çığış ta yasadılar. Ayruça elekkege BMO general sekretarı Kofi Annan da ber konferentsiägä qatnaşu öçen İstanbulğa kilde, anıñ da täqdime konfliktnı tınıç yullar belän cişü ide.



Qısqası ütä uñ Millätçe Xäräkät Patriäse belän xalıqnıñ baytaq ber öleşe DTP-ne yabunı, Tönyaq Ğıyraqtağı PKK bazaların xärbi çaralar belän yuq itüne yaqlıylar. Läkin AK partiä xökümäte tınıçraq yullar ezli häm şunıñ arqılı Yaqın Könçığış illäre belän ekonomik mönäsäbätlären köçäytergä tırışa. Ayruça bu politika arqılı üzenä tawış birgän kördlärne dä tınıçlandırunı maqsat itep quya. Çөnki bıyılğı parlament saylawlarında küpçelek kördlär yäşägän Könçığış , Könyaq könçığış rayonnarı belän Törkiäneñ törle zur şähärlärenä taralğan kördlärdän küp tawış aldı, farazlarğa kürä AK partiädä 80 tiräsendä çığışı belän körd deputat bar. Ä radikal körd partiäse DTP-neñ nibarı 20 genä deputatı parlamentta.

İstanbul, Äxtäm İbrahim



XS
SM
MD
LG