Accessibility links

якшәмбе, 4 декабрь 2016, Казан вакыты 21:41

Tiflis Abxaziä mäsäläsendä Rusiäne kisätä


Uzğan atnada Gruziädä oppozitsiäneñ qırıs çaralar belän bastırıluınnan häm Mäskäw oyıştırğan tüntäreleşne bastıru öçen köç qullanu kiräk ide digän belderülärdän soñ Tiflis belän Mäskäw arasında kierenkelek arta bara. Xäzer moña Gruziädän ayırılırğa teläwçe, Mäskäw yawlı respublikalar mäsäläse dä quşıla. Başta Rusiäneñ Abxaziägä yäşeren räweştä ğäskärlär kertüe turında süzlär çıqtı. Soñraq Gruziä parlamentınıñ täesirle ber äğzası Mäskäw Abxaziäneñ bäysezlegen tanırğa äzerlänä dip belderde.

Bu atnada Gruziä prezidentı Mixail Saakaşvili qurqınıç işek töbendä häm xätta ber ayağı belän öyebezgä kerde dip belderde.

Antakiçtä isä Gruziä parlamentınıñ Saqlanu häm Iminlek Komitetı räise Givi Targamadze bu öyne cimerüne yaqlar öçe tışta äzerleklär bara häm mondıy ğämällärne Tiflis suğış ğämälenä sanıyaçaq dide.

Azatlıq radiosına Targamadze Rusiä üzen üze bäysez dip iğlan itkän ämma xalıqara cämäğätçelek tarafınnan tanılmağan Abxaziäne tanırğa cıyına dide.

"Ägär dä Abxaziäne tanısalar, Gruziäneñ çınlıqta başqa çarası qalmıy. Bu tanunıñ qorallı nizağqa kiterü mömkinlege turında äytep tä torası yuq. Abxaziäneñ bäysezlege Rusiä tarafınnan tanılu Gruziägä qarşı suğış iğlan itüne añlataçaq" di Targamadze.

Tiflis Abxaziägä inde soñğı könnärdä yözlärçä Rusiä xärbie häm xärbi qoralları kertelde dip tä belderde. Rusiä häm Abxaziä xakimiätläre isä monı kisken kire qağa.

Mäskäw bu belderüne provokatsiä dip atadı. Abxaziäneñ de facto saqlanu ministrı urınbasarı Garri Kupalba Abxaziä prezidentınıñ internet säxifäsendä Abxaziädä BDB tınıçlıq saqlawçılarınnan başqa çit il ğäskärläre yuq dip belderde.

Kupalba belderüendä "Gruziä xakimiätläre üzläreneñ eçke säyäsi problemaların çişü öçen Abxaziädäge wäzğiätne kierenkeläşterergä teli" dielä.

Ni genä bulmasın Tiflis xalıqara cämäğätçelekkä Abxaziädäge wäzğiät turında üz fikeren beldergänlegen äytä. Targamadze dönya citäkçeläreneñ Mäskäwneñ Abxaziä däwlätçelegen yaqlawına yul quymaw öçen tiz arada mönäsäbät belderä almawına borçıluın äytte.

"Ägär dä xalıqara cämäğätçelek Abxaziäneñ tanıluına taba alıp baruçı bu protsessnı tuqtata almasa, ä bu protsess xäzer inde bara, ägär dä xalıqara cämäğätçelek Rusiäneñ Abxaziägä ğäskärlär kertüen tuqtata almasa, Abxaziäneñ bäysezlegen tanudan çigenü tağın da qıyınraq bulaçaq. Gruziä älbättä Rusiäneñ Abxaziäne tanuı belän kileşä almıyaçaq, çönki bu barı şul cirgä genä tügel, ğömümän Gruziä däwlätçelegenä qurqınıç tudıra" dide Targamadze.

Anıñ fikerençä Serbiädän ayırılırğa teläwçe Kosovonıñ kiläçäk statusı bu mäsälädä bik möhim bulaçaq. Mäğlüm bulğança AQŞ Kosovonıñ bäysezlegen yaqlasa, Rusiä aña qarşı çığa.

"Küpmeder däräcädä Rusiä inde Abxaziädäge wäzğiätne äzerli dä başladı. Bälkem Kosovonıñ tanıluınnan soñ Rusiä Abxaziäne tanır. Başqaça äytkändä, Rusiä bu yünäleştä maqsatçan eşläwen däwam itäçäk häm Abxaziäne üz ğäskärläre, qoralları belän tutıraçaq dip uylıym. Bu fevral ayına, Kosovo mäsäläse çişelgänçegä qädär däwam itäçäk. Ul oçraqta Rusiä Gruziäne tanu mömkinlegenä iä bulaçaq" di Targamadze.

Comğa könne Vremya Novostey basmasında Rusiäneñ Säyäsi häm xärbi analiz institutı mödire Aleksandr Şaravin isä Abxaziä mäsäläsen çişü öçen bu respublikanı ikegä bülüne täqdim itte. Şaravin Abxaziäneñ könçığış öleşe Gruziägä tapşırıp anda görci qaçaqların qaytarıp urnaştıru mömkin bulır ide di. Gruziä prezidentı Saakaşvili äytüençä, Rusiä prezidentı Vladimir Putin da äle elegräk ber oçraşuda Abxaziäne Qıbrız ürnägendä bülü mömkinlegen kütärgän bulğan. Ämma Tiflis Abxaziäneñ xätta ber adımr ciren dä birergä cıyınmawın belderä.

Naif Aqmal
XS
SM
MD
LG