Accessibility links

Кайнар хәбәр

Yevropa Berlege Kosovo bäysezlege xäl itelgän dip qurqa


Kosovonı bäysezlekne ber yaqlı ğına iğlan itep Serbiädän çığuın tuqtatu öçen soñğı diplomatik çaralar kürelä. Yevropa Berlege ministrları 10 dekabergä qadär möstaqillek iğlan itü – ber yaqlı ğına bulmasın öçen quldan kilgänne eşlärgä tırışaçaqların belderde. Kosovo bäysezlek iğlan itä qalsa – monıñ böten Balkan töbägenä genä tügel, ayırılıp çığarğa telägän başqa töbäklärgä dä yoğıntısı bulaçaq.

Bügen dä Brüsseldä cıyılğan Yevropa Berlegeneñ tışqı eşlär ministrları Serbiä belän ayırılırğa telägän Kosovo töbäge arasında kileşügä ireşep bulmayaçağın küz aldına kiterä ala. Berlektä räislek itkän Portugaliäneñ tışqı eşlär ministrı Luis Amado, diplomatik çişeleşkä bik ışanmıy:

"Kileşügä ireşer öçen bez ilçe İçinger belän soñğı mizgelgä qadär tırışaçaqbız. Böten taraflar da yaqlağan kileşü älbättä totrıqlılıqnıñ nigeze bulır ide. Ägärä dä bu mömkin bulmasa, dönya tırışlıqların tuqtatmayaçaq, wazğiätkä bäyä birep qararlar qabul itärgä kiräk bulaçaq."

Kosovo statusın xäl itü eşendä qatnaşqan Yevropa Berlege äğzase, ilçe Wolfgang İçinger, Kosovo belän Serbiäne kileşterü öçen mömkin bulğan barlıq çaralar kürelde, dide.

Şimbä könne Kosovoda uzğan parlament saylawlarında ciñgän Haşim Taçi, töbäk 10 dikaberdän soñ bäysezlek iğlan itäçäk, dip belderde. Serbiä bu adımnı qabul itmäyäçägen qabatladı. BMO İminlek Şurasında da fikerlär ayırıldı. Rusiä Kosovonıñ ayırılıp çığuına qarşı.

Kosovo häm Serbiä aradaşçıları irtägä Brüsseldä häm ay azağında Venada oçraşaçaq. Yevropa Berlege ministrları Kosovonı kisken adımnar yasamasqa çaqırdı. Şvesiä tışqı eşlär ministrı Carl Bildt, Priştinağa Yevropa Berlege häm NATO yaqlawı kiräk bulaçaq, äle, dide:

"Kosovo inde bolay da Serbiädän ayırılğan. Häm minemçä Kosovonıñ xalıqara cämäğätçelektän dä ayırılırğa teläge yuq – alar üzläreneñ NATO tarafınnan, küpmeder däräcädä Yevropa Berlege tarafınnan yaqlanuın teli. Min alar aldında ber genä maqsat quyır idem, ul da bulsa Kosovonıñ berdämlege."

Berlek räsmiläre monı açıq itep tanırğa telämäsälär dä, Yevropa Berlegeneñ Kosovo citäkçelegenä tösir itü köçe zur tügel. 2003nçe yıl sammitında Kosovo, başqa Balkan däwlätläre belän bergä Berlekkä kerergä äzerlänüen beldergän ide. Priştina Quşma Ştatlar häm Yevropanıñ qayber illäreneñ yaqlawın belä.

Biredä Berlekneñ üzenä dä bu mäsälädä tarqalu yanıy. İspaniä, Slovakiä, Romaniä häm Gresiä – Kosovonıñ ber yaqlı bäysezlek iğlan itüennän qurqa. Berlekneñ iñ zur äğzase Germaniä – bu mäsälädä üz qaraşın äle beldermäde.

Ägär dä berlek waqiğalarnı kontroldän ıçqındırsa, Balkannarnıñ Könbatışında yañadan millätara nizaqlar çığu qurqınıçı tua. 90nçı yıllar başında Yevropa Berlege töbäkne suğışqa taba barudan tuqtata almıyça, Quşma Ştatlar häm NATOğa yardäm sorap möräcäğät itergä mäcbür qalğan ide.
XS
SM
MD
LG