Accessibility links

чәршәмбе, 7 декабрь 2016, Казан вакыты 23:32

Rusiädä prezident saylawları könen äle bilgelädelär genä, ä menä Gruziädä prezident urını öçen yarış inde başlandı - yäkşämbedä ilneñ xäzerge başlığı Mixail Saakaşvili urınınnan kitüen häm yañadan saylanu öçen köräş başlayaçağın iğlan itte. Bu yäkşämbedä buldı. Şul uq könne oppozitsiä Tiflis uramnarına çığıp, xökümättän bäysez sanalğan İmedi telekanalı eşen yañartunı taläp itte.

Gruziädä prezident saylawları ğinwarnıñ 5-enä bilgelängän. Bügen şuşı urınğa däğwä itä aluçılar isemlege açıqlandı, Üzäk saylaw komissiäsendä terkälü öçen düşämbe soñğı kön ide. Monı älegä yaqınça unlap keşe eşläde, alar arasında Şalva Natelaşvili, David Gamkrelidze, xätta eşmäkär Bädri Patarkatsişvili dä bar.

Ämma bu isemlek tä aldağı könnärdä üzgärä ala. Dikäbrneñ 6-sına qädär härber nämzät üzen yaqlawçılardan 50 meñ imza cıyarğa tieş bulaçaq, räsmi däğwaçı bularaq alar şunnan soñ ğına isäplänä başlayaçaq.

Nämzätlär arasında ilneñ xäzerge prezidentı Mixail Saakaşvili dä bar. Döres, xäzer inde ul prezident sanala almıy - yarışta qatnaşu öçen Saakaşvili urınınnan kitärgä tieş buldı. Ämma ul üzeneñ kire qaytuına nıq ışana kebek, anıñ belderüennän şul añlaşıla:

"Barığız da beläsez ki, bez saylawaldı kampaniäsen başlap cibäräbez. Minem wäkälätlär 40 köngä parlament räise Nino Burjanadzegä tapşırılıp toraçaq. Min isä prezident saylawlarına äzerlänäçäkmen", dide Mixail Saakaşvili.

Ul şuşı belderüen yasağanda oppozitsiäneñ distälärçä meñ tarafdarı Tiflis uramnarına çığıp, xakimiättän bäysez sanalğan İmedi televideniäse eşen yañartunı taläp itte.

"Bez Nino Burjanadzeneñ İmedi eşli başlawı öçen kiçekmästän tieşle çaralar kürüen telibez, ägär dä bu bulmıy ikän, bez inde yänä cıyınğa çığıp Burjanadzene dä bärep töşeräçäkbez", dip yanadı Tiflistäge protestta oppozitsiäneñ urtaq nämzäte sanalğan Levan Gaçeçiladze.

İmedi telekanalı tapşıruları noyäbr başında Saakaşvili xökümäte tarafınnan, oppozitsiäneñ xakimiätkä qarşı oyıştırğan cıyınnarınnan soñ tuqtatılğan ide.

Yäkşämbe kiçen Rustavi 2 kanalında bäyän itelgän ber äñgämäsendä Mixail Saakaşvili İmedine yabunı aqlap, ul telekanalnı "yalğan maşinası" dip atağan ide. Saakaşvili süzlärenä qarağanda, telekanal üz eşen däwam itä alaçaq, ämma ul başta, İmedine oyıştırğan eşmäkär Bädri Patarkatsişvili qullarında qoral bulmayaçağına garantiälär birergä tieş.

XS
SM
MD
LG