Accessibility links

шимбә, 10 декабрь 2016, Казан вакыты 17:42

Burjanadze: Rusiäneñ ni telägänen Gruziädä här bala belä


Nino Burjanadze radiobıznıñ gruzin bülege xezmätkäre Koba Liklikadzeğa äñgämä birä

Nino Burjanadze radiobıznıñ gruzin bülege xezmätkäre Koba Liklikadzeğa äñgämä birä

5 ğinwarda ütäçäk prezident saylawlarında qatnaşu öçen, Mixail Saakaşvili, qanun taläp itkänçä, 25 noyäberdä urınınnan kitte. Prezident wazifasın xäzer parlament räise Nino Burjanadze başqara. Sişämbedä ul radiobızğa äñgämä birde.

Prezident wazifası Nino xanım öçen yañalıq tügel. 2003 gölçäçäk inqilabınnan soñ Eduard Şevarnadze urınınnan kitkäç, ul bu wazifanı ber başqarğan ide inde.

Radibızğa birgän äñgämäse waqıtında Nino xanım Gruziäneñ yänä başbaştaqlıqqa kerep batuına ükeneç belderde. Läkin bu awır çorlar beter, saylawlardan soñ il normal tormışınа qaytır digän ömeten äytte.

7 noyäber könne xökümät oppozitsiä qarşılığın bastırıp xata yasamadımı digän sorawğa, Burjanadze, yuq, min alay uylamıym, qayber oppozitsiä citäkçeläre ul könne xättä xökümätne bärep töşerergä çaqırdı, dide.

Protest çaralarınnan soñ yabılğan oppozitsiä taraflı İmedi televidenieseneñ kiläçäk yazmışı turındağı sorawğa, Nino xanım, bu kanal eşquar häm prezidentlıqqa namzät Badri Patarkatsişvilineñ "qoralı" buludan tuqtasa ğına efirğa qaytarılaçaq, dide.

Gruziä räsmiläre Tiflistäge qarşılq çaraları artında Rusiäneñ küzläw xezmätläre tora di häm qayber oppozitsiä citäkçelären bu xezmätlär belän xezmättäşlek itüdä ğayepli.

Mäskäw bu ğayepläwlärne kire qağa. Ämmä Burjanadze radiobızğa birgän äñgämäse waqıtında, prokurorlarnıñ moña dälilläre inde bar häm tağın tabılaçaq, dide.

Ä inde ğomum niätlärgä kilgändä, "Rusiäneñ Gruziädä närsä telägänen Gruziädä här bala belä", dide ul. "Gruziädä totrıqsızlq bulu Rusiä öçen bik möxim. Xökümäte zäğif bulsa, Gruziä Rusiä belän ber däräcädä säyläşä almıyaçaq. Ul eçke mäsälälär belän mäşğül bulaçaq, anıñ Abxaziä, Könyaq Osetiä, NATO kebek mäsälälärgä waqıtı qalmayaçaq" dide ul.

Burjanadze, Gruziäneñ alğan yulınnan tayıplmawı, 5 ğinawarda irekle häm ğädel saylawlar ütkärü öçen qulınnan kilgänen eşliäçägen äytte.

"Sezgä açıqça äytim, min Mixail Saakaşvilineñ ikençe möddätkä prezident bulluın tulısınça xuplıym. Ul bu ul öçen başqa sıymaslıq, awır eşlär başqardı. Älbättä mondıy reformalar xatasız bula almıy. Häm bu eşne berkem dä xatasız başqara almas ide. Şul isäptän, min dä. Bu minem eçkersez fikerem häm anı kire qağu bik awır" dide Nino Burjanadze.

XS
SM
MD
LG