Accessibility links

җомга, 9 декабрь 2016, Казан вакыты 18:28

Rusiä prezidentı televideniä aşa inde kötelgän çığışın yasap, xalıqnı Berdäm Rusiä öçen tawış birergä çaqırdı. Häm şunda uq Duma saylawlarındağı köndäş partiälärneñ, prezident Rusiä qanunnarın boza, digän ğäyepläwlärenä duçar qaldı.


Tawış birü könenä qädär äle tulı ike kön bar, şuña da Rusiä telekanallarında törle partiälärneñ nämzätlären kürü ber dä ğäcäyep tügel. Anda xäzer yıllar buyı federal' televideniä ekrannarına çığarılmağan Yavlinski, Züganovlarnı da kürep bula.

Atnakiç köndez televideniä aşa şundıy nämzätlärneñ berse, Berdäm Rusiä isemlegen citäklägän Vladimir Putin dä çığış yasadı. Mäğlüm ki, ul berük waqıtta Rusiäneñ prezidentı da. Bu çığışın ul nindi däräcädä yasadı - monı älegä belgeçlär dä belep betermi. Beryaqtan, televideniä Putin sürätlären "prezidentnıñ mäğlümät çaraları häm Rusiä watandaşlarınnan alınğan küpsanlı sorawlarğa cawapları" dip atadı. Yäğni, Putinneñ monı prezident bularaq eşläwen tanıdı.

İkençe yaqtan, şuşı çığış inde ütkän atnada uq yazdırılğan ide, häm monı Putin Kremldä urnaşqan maxsus telestudiädä tügel, ä Ostankinoğa barıp eşläde. Yäğni, ul bu eşne ğadi ber nämzät, Berdäm Rusiä nämzäte bularaq qına başqara digän añlatma birelde.

Berdäm Rusiä partiäse xäzer dä näq menä şuşı ikençe versiäne alğa sörä. Mäğnäwi yaqtan da Putin asılda bernindi dä yaña närsä äytmäde. Elegräk Lujnikida üz tarafdarları belän ütkärgän cıyındağı süzlären - anıñ citäkçelege astında iqtisadi, säyäsi uñışlarğa ireşüen, 90-nçı yıllarda citäkçelek itkän köçlärneñ kire xakimiätkä qaytırğa teläwen, moña hiç kenä dä yul quyarğa yaramawın qabatladı.

Häm çığışı azağında açıqtan-açıq saylawlarda äwzem qatnaşuğa, anda Berdäm Rusiä öçen tawış birügä öndäde. Monı soñraq Tatarstannıñ Yaña Ğasır telekanalı da qabatlap birde.

Ägär dä ul çınnan da Berdäm Rusiä keşese bularaq möräcäğät itkän ikän, bu oçraqta anıñ çığışı partiä fondınnan tülänergä häm monıñ Üzäk saylaw komissiäse tarafınnan tikşerelüe şart - qanun härxäldä şulay dip bilgeli. Moñardan tış, bu şartlar ütälgän oçraqta da, Putin çığışı yañalıqlarda tügel, ä ayırım bilgelängän waqıtta çığarğa tieş ide.

Putinneñ şulay itep qanunnı bozuın küpmeder tomalaw öçen anıñ çığışınnan soñ şul uq yañalıqlarda Vladimir Jirinovski häm Gennadi Züganovnı da kürsätälär, alar da üz partiäläre öçen tawış birügä öndi. Häm şulay itep, oppozitsiäneñ ber öleşe xäzer Putin ğämällärenä zarlana da almıy bulıp çığa.

Saylaw qanunın, şul isäptän agitatsiä-qıstaw eşlären alıp baru tärtiben bozu Rusiädä administrativ ğäyep eş sanala häm monıñ öçen 15 minimal eş xaqı külämendä aqçalata cäza qaralğan.
XS
SM
MD
LG