Accessibility links

Кайнар хәбәр

AQŞ Rusiä täqdimenä qarşı çıqtı


Nicholas Burns Madrid oçraşuında çığış yasıy, 28.11.2007
Nicholas Burns Madrid oçraşuında çığış yasıy, 28.11.2007

Rusiä YİXOnıñ saylawlarnı küzätü mömkinlegen çiklärgä täqdim itkän ide. AQŞ wäkile Nicholas Burns andıy niätlärgä yul quyılmayaçaq, dip belderde.

Yevropada iminlek häm xezmättäşlek oyışması (YİXO) tışqı eşlär ministrları Madridta barğan 2 könlek oçraşuda oyışmanıñ kiläçägenä qarağan möxim mäsälälär tikşerä. Rusiä bu oyışmanıñ törle illärdä saylawlarnı küzätü mömkinlegen çiklägän täqdimnär yasağan ide. Bügen Madridta Quşma Ştatlar wäkile Nicholas Burns andıy niätlärgä yul quyılmayaçaq, dip belderde.

29-30 noyäber könnärendä Madridta barğan oçraşuda Quşma Ştatlarnı wäkillek itkän däwlät sekretare urınbasarı Nicholas Burns Yevropada iminlek häm xezmättäşlek oyışmasınıñ saylawlarnı küzätü wäqäläten saqlap qalırğa çaqırdı. Anıñ süzlärençä, Rusiäneñ bu wäkälätne kimetü täqdime oyışmağa zur zıyan kiteräçäk:

"Rusiäneñ bu täqdime oyışmanı bik nıq zäğiflätäçäk. Qızğanıçqa qarşı, aña Üzbäkstan, Belarus häm Qazaxstan da quşılğan. Bez moña qatğıy qarşı" dide amerikan räsmie.

Burns süzlärençä, mondıy täqdim Madridta ğına tügel, kiläse oşraşularda da kire qağılırğa tieş. Oyışmanı zäğifälätkän adımğa barırğa yaramıy, dide ul.

Bilgele bulğança, Rusiä Yevropada iminlek häm xezmättäşlek oyışmasınıñ saylawlarnı küzätü eşçänlegen şaqtıy çiklärgä täqdim itkän ide. Mäskäw äzerlägän täqdimnärdä küzätüçelär sanın 50 belän çikläw qaralğan. Monnan tış, räsmi näticälär iğlan itelmi torıp, küzätüçelär üz fikeren äytmäskä tieş, dielgän.

Bu yäkşämbedä ütäçäk Duma saylawlarnında bu oyışmadan küzätüçelär bulmayaçaq. Oıyşma Rusiäne küzätüçelärgä tieşle şartlar tudırmawda, viza birmäwdä, ğomumän, ayaq çaluda ğayepläde häm Rusiägä barudan baş tarttı. Kreml älege ğayepläwne kire qaqtı. Bu atnada Rusiä prezidentı Vladimir Putin oyışmanıñ Rusiägä barmawı artında Waşington tora digän belderü uasadı.

Nicholas Burns bu ğäyepläwne safsata dip atadı:

"Monıñ öçen Quşma Ştatlarnı yä däwlät departamentın ğayepläw – safsata. Rusiäneñ qağidälärne bozğanı Venada härkemgä kön kebek açıq. Küzätüçelärgä eşläp bulmaslıq şartlar tudırıldı. Soñğı 15 yılda mondıy xälneñ bulğanı yuq ide" dide amerikan räsmie.

Madrid oçraşuda tikşerelgän tağın ber mäsälä – 2009 yılda räislekne Qazastanğa birü mäsäläse.

Quşma Ştatlar, Britaniä, Çexiä häm tağın berniçä äzğa il, Qazaxstandağı keşe xoquqları torışın iskä alıp moña qarşı çığa.

Şulay itep, Astanä räislekkä ireşä almas kebek. Çönki räislek mäsäläse oyışmadağı 56 ilneñ dä rizalığı belän xäl itelergä tieş.

XS
SM
MD
LG