Törkiädä oçqıç qazasında 56 keşe häläk bulğan

Ankara. Törkiä räsmiläre xäbär itüençä, bügen Törkiädä oçqıç qazası näticäsenda andağı 56 keşeneñ barısı da häläk bulğan. Qaza Antalya şähärennän 150 çaqırım tönyaqqa, tawlı töbäktä bulğan. Atlasjet şirkäteneñ İstanbuldan İspartağa baruçı oçqıçında 49 yulçı häm 7 ekipaj wäkile bulğan.

İsparta hawa alanına töşergä berniçä minut qala oçqıç radardan yuğalğan. Qazanıñ säbäpläre älegä bilgele tügel.

Soñğı xäbärlärgä qarağanda, qazağa eläkkän oçqıç - McDonnell Douglas 83nıñ qaldıqları inde tabılğan.