Accessibility links

шимбә, 3 декабрь 2016, Казан вакыты 22:53

Berençel näticälär: Dumada yänä dürt partiä bulırğa oşağan


Rusiädä ğäskärilär tawış birä, 2.12.2007

Rusiädä ğäskärilär tawış birä, 2.12.2007

Rusiä üz tarixınıñ yaña säxifäsen başlap cibärde – ildä Däwlät Dumasına çirattağı saylawlar uzdı. Bu yulı zur üzençälek belän, Dumağa xäzer fäqät partiä isemlekläre belän genä elägep bula. Älegä sanalğan tawışlardan şul kürenä, anda yänä 4 partiä wäkilläre bulaçaq.

İñ zur yaqlawnı, kötelgänçä, Vladimir Putin citäklägän häm Kreml qanatı astında torğan “Berdäm Rusiä” partiäse qazandı, älegä ul sanalğan tawışlarnıñ yaqınça 63 protsentın cıyğan dip xäbär itelä. Qalğan partiälär xakimiät partiäsennän nıq qalışa, ämma şulay da alarnıñ 3se Dumağa ütä – Rusiä kommunistları 11.5%, urıs millätçeläreneñ Liberal-demokratları – 9.5% häm saylawlar aldınnan ğına köçkä oyışıp betkän “Ğädel Rusiä” – 7.5% tawış qazanğan.

Xakimiätneñ xäzerge üzäkläşterü kursına ayawsız qarşı torğan oppozitsiä – “Yabloko” firqase häm Uñ Köçlär berlege isä yänä Däwlät Dumasına uzmıy, alarnı yaqlaw, räsmi mäğlümätkä qarağanda, 7 protsenttan tübänräk. “Yabloko”nı tawış birüçelärneñ 1.5%, ä uñ köçlärne – 1.1% yaqlağan.

Oppozitsiä tawış birüneñ iskitmäle bozular häm xäärämläşülär belän ütüenä zarlana, saylaw könendä dä xakimiät yaqlawın qazanğan “Berdäm Rusiä” öçen agitatsiä alıp barıldı, qayber urınnarda xalıqnı tawış birügä köçläp kiterdelär, dip belderä. “Başqa Rusiä” xäräkäteneñ citäkçese Garry Kasparov süzlärenä qarağanda, bu saylawlar Rusiädä saylaw mömkinlege bulmıy ğına uzdı. Tawış birüneñ ğädel bulmawın Rusiä kommunistları citäkçese Gennadi Züganov ta äytä, häm anıñ näticälären kiläse atnada mäxkämägä biräçägen belderä.

Ayıruça tupas xärämläşülär Mäskäwdä häm Başqortstanda küzätelde, dip xäbär itä tawış birüne qarap barğan Rusiäneñ İrekle saylawlar fondı häm başqa bäysez törkemnär wäkilläre.

Üzäk saylaw komissiäse, Duma saylawlarında bu yulı, xoquqı bulğannarnıñ 60-lap protsentı qatnaştı dip belderde. Tawış birüneñ tögäl näticäläre 7-8 dikäbrgä bilgele bulaçaq.
XS
SM
MD
LG