Accessibility links

Кайнар хәбәр

Ukrain xökümäten qoru haman kiçekterelä


Yuçenko xökümät citäkçese itep Timoşenkonı täqdim itä
Yuçenko xökümät citäkçese itep Timoşenkonı täqdim itä

Ukraina prezidentı Yuçenko pänceşämbe könne ilneñ yaña parlamentına premyer-ministr urınına tanılğan säyäsätçe Yuliä Timoşenkonı täqdim itsä dä, berük waqıtta Yuğarı radanı bu eş belän älegä bik aşıqmasqa da öndi.

Soñğı berniçä yıl täcribäsennän kürengänçä, ukrain xökümäten bilgeläw dönyadağı iñ qatlawlı eşlärneñ berse bulıp tora. Yuğarı radanıñ räise saylanu belän anda xäzer yaña premyer-ministrnı bilgeläw öçen yul açılğan ide.

Pänceşämbedä prezident Radağa aldan kötelgänçä, xökümät qoru eşen tanılğan säyäsätçe, äflisun inqilabınıñ yözenä äylängän Yuliä Timoşenkoğa tapşırunı täqdim itte, bu turıda xatnı ul qanunda qaralğança, Yuğarı rada citäkçese Arseni Yatsenyukqa yullağan ide.

Ämma eşlär premyer-ministr mäs'äläsen qarawğa barıp citmäde. Başta Viktor Yuçenko üze deputatlarnı, xökümät başlığın saylawğa qädär qayber aşığıç qanunnarnı qararğa häm kiçekmästän qabul itärgä çaqırdı. Süzneñ biredä nindi qanunnar turında baruına açıqlıqnı Yuliä Timoşenko kertte:

"Xökümätne tözügä qädär bez 12 xälitkeç qanunnı qararğa buldıq, alar arasında parlament äğzalarınıñ qulaylıqların häm qağılsızlığın beterü, rişwätçelek öçen qırıs cawaplılıq kertü kebekläre bar. Şul qanunnarnı qabul itep bez tärtipne başta parlamentta, ä annarı inde bar ildä urnaştırırğa telibez", di Ukraina xökümäten citäkläwgä täqdim itelgän Yuliä Timoşenko.

Nämzätneñ premyer itep saylanuı öçen Yuğarı radada 226 tawış citä, Yuliä Timoşenko blogı häm prezident yaqlı Naşa Ukrainanıñ deputatları monıñ öçen citärlek, alarda barlığı 228 tawış inde bar.

Şuña da premyer-ministrı saylaw asılda inde yaqın könnärdä dä bula ala, çönki töştän soñ Kievtän, prezident inde elekke şartnı - yäğni qayber qanunnar qabul itüne alay aşıqtırmıy, digän xäbärlär dä kilde.

Ämma kiçkä taba Ukraina parlamentında başqa ber mäs'älä - räis urınbasarların häm komitet başlıqların saylaw mäs'äläsendä xällär qızıp kitte. Oppozitsiägä küçärgä torğan Töbäklär firqası häm kommunistlar, Radadağı bar citäkçel urınnarnı da Naşa Ukraina häm Yuliä Timoşenko blogı alırğa cıyına digän sıltaw belän räis häm töp mönbär tiräsenä cıyılıp, uıtırışnı başlawğa kirtä quyarğa buldı.

XS
SM
MD
LG