Accessibility links

чәршәмбе, 7 декабрь 2016, Казан вакыты 19:38

Rusiä prezidentı Vladimir Putin kiläse prezidentlıqqa berençe vitse-premier Dmitriy Medevedev namzätenä xuplaw belderde. Bu täqdimne aña düşämbedä Rusiäneñ 4 partiä citäkçese yasadı. Bügenge Rusiädä bar moxim qararlarnıñ Kremldä qabul itelgänen iskä alğanda, Rusiäneñ kiläse prezidentı inde mäğlüm diärgä bula.

Berençe qaraşqa Vladimir Putinnıñ üzeneñ warisı itep Dmitriy Medvedevne saylawı ällä ni zur yañalıq tügel.

Rusiä xökümätendäge ike berençe vitse-premiernıñ berse – yä Dmitriy Medvedev yä elekke saqlanu ministrı Sergei İvanov kiläse prezident bulaçaq digän fiker küptän bar ide.

Berse 2005tä, ikençese bu yıl başında berençe vitse-premier bulğannan soñ, alar kiläse prezidentlıqqa ike nazmät bulıp qarala başladı.

Düşämbedä Rusiäneñ 4 partiäse – Berdäm Rusiä, Ğädel Rusiä, Watandaşlar köçe häm Agrar partiä citäkçeläre Kremlgä kilep urtaq täqdimen äytkäç, Putin moña xuplaw belderde:

"Min anıñ belän 17 yıldan artıq tanış, bu yıllar buyına bez bik yaqın bergä eşlädek, bu täqdimne tulısı belän xuplıym" dide Rusiä prezidentı.

Putın waris itep näq menä Medvedevnı saylap ällä ni şaqqattırmadı. Yañalıq – bu qararnı iğlan itü waqıtında.

Dumadağı urınnarnıñ 2/3-en alğan Berdäm Rusiä partiäse üzeneñ namzäten räsmi töstä 17 dekaberdä äytäse ide. Putin üz fikeren ber atna aldan äytte.

42 yäşlek Medevedev, Putinnıñ bar yaqın tirälege şikelle, çığışı belän Peterburdan. 1965tä tuğan, Putin kebek ük, Peterbur universitetınıñ yuridik fakultetın betergän. 1990nçı yıllar başında şähär idaräseneñ Putin citäklägän xalıqara bäyläneşlär komitetında eşlägän.

2000 yılda Putinnıñ berençe prezidentlıq kampaniäsen ütkärgännän soñ, ul prezident idaräse başlığı urınbasarı itep bilgelänä. Berük waqıtta Gazprom şirkäteneñ direktorlar şurasın citäkli.

2003 yıldan prezident idaräse başlığı. Soñğı 2 yılda däwlätküläm programmalar öçen cawaplı berençe vitse-premier.

KGB veteranı, yış qına qırıs belderülär yasağan Sergey İvanov belän çağıştırğa, Medvedev yomşağraq xolıqlı zıyalı sanala.

Uzğan ayda Qazanğa bulğan säfäre waqıtında Medevdev Rusiä İslam universitetında bulıp, İslam mäğärifen üsterergä kiräk digän süzlär dä äytep kitkän ide.
XS
SM
MD
LG