Accessibility links

якшәмбе, 4 декабрь 2016, Казан вакыты 15:18

Bötendönya tatar kongressınıñ Törkiädä üzğan küçmä utırışı näticäläre


Bötendönya tatar kongressınıñ Törkiädä üzğan küçmä utırışı näticäläre

Rusiä Konstitutsiäse köne bäyrämennän soñ räsmi çığanaqlardan alınğan xäbärlär arasında iñ berençe urında Bötendönya tatar kongressınıñ Törkiädä üzğan küçmä utırışı näticäläre. Tatarstan delegatsiäseneñ İstanbulda, Änqarada, İskeşähärdä buluı, Törkiäneñ milli mäğärif ministrı, däwlät ministrı, İstanbul häm İskeşähär citäkçeläre belän oçraşuları turında äytelä. Delegatsiäneñ şulay uq Rusiäneñ Änqaradağı ilçelegendä häm İstanbuldığa general' konsullıqta qabul itüleläre turında xäbär itelä. Oçraşularnıñ iñ möhim näticäse itep, Tatarstan belän Rusiä arasında mägrifät ölkäsendä xezmättäşlek turında kileşü tözü kiterelä. Bötendönya tatar kongressınıñ İstanbulda ütkän küçmä utırışınıñ BDB illäre çiklärennän tış täwge ütkän utırış, dielä. Bu utırışta tatar diasporasınıñ xäle, anıñ problemaları häm çişü yulları tikşerelde, dielä räsmi xäbärdä. Bötendönya tatar kongressı delegatsiäseneñ Törkiägä vizitı Tatarstanda zur yañğıraş taptı, tatar cämäğätçelegeneñ ruxın, küñelen kütärep cibärde, disäñ dä bula. Tatarstan teleradiokompaniäse televideniedä häm radioda şuşı waqığağa bağışlanğan berniçä tapşıru äzerläp çıqtı. 13 dekaberdä Tatarstan radiosınıñ «Dönya» studiäse Törkiägä vizitta qatnaşuçılar belän turı efirda «tügäräk östäl» ütkärde. Milli universitet açu, latinğa küçü problemalarına qarata häm III Bötendönya tatar Kongressı uzdıru waqıtı turındağı sorawlarğa İndus Tahirow cawap birde. Ul Milli universitet, yäğni milli yuğarı uqu yortı mäs’äläse xäl itelgän, anıñ iseme genä başqaça bulırğa mömkin, dide. Latin imlasına küçü dä tuqtatılmıy, programma däwam iteläçäk. Ä inde öçençe Kongress Ustavta bilgelängän waqıtta, 2002 yılnıñ cäendä ütkärelergä tieş. Dönyalar niçek bulır, anısın inde Alla üze genä belä.

Radiotıñlawçılar soñğı waqıtta cämäğätçelekne borçığan başqa mäs’älälärne dä quydılar. Äytik, soñğı waqıtta milli-mädäni möxtäriät, Bötendönya tatar kongressı citäkçelegen Mäskäwgä küçelär ikän, digän xäbärlär yörde. «Tügäräk östäl»dä qatnaşuçılar mondıy närsäneñ mömkin tügellegen, dönyaküläm, rusiäküläm tatar oeşmaları citäkçelege, hiçşiksez, Qazanda qalaçaq.
XS
SM
MD
LG