Accessibility links

Кайнар хәбәр

Tatarstanda AİDS belän awıruçılar sanı arta


Tatarstanda AİDS belän awıruçılar sanı arta

Amerika Quşma Ştatlarınıñ raketalardan saqlanu turındağı kileşüdän çığuı häm Rusiä citäkçelegeneñ bu ğamälne xata dip bilgeläp, üz yulınnan barırğa cıyınuı Tatarstan cämäğätçelegendä bernindi dä reaksiä uyatmadı. Yaxşığamı bu adımnar, yamanğamı — äytep bulmıy. Suğış çıqmasa — şul citkän. Ä suğış häm başqa bälä-qazalarnıñ kilep çığu mömkinlege turında härkem belep tora.

Xäyer, anısına da künegä başladıq buğay. Narkomaniä häm AİDS kebek sotsial' awırular ğadäti xälgä äylänep bara. Soñğı 5 yıl eçendä Qazan şähärendä narkotik qullanuçılarnıñ sanı öç tapqırğa artqan. Şuşı yılnıñ berençe oktäberenä Qazanda 4169 narkoman terkälgän. Alarnıñ 80 protsentı — yäşlär. Qazan universitetında xisapqa alınğan 16 student narkoman bar. Narkotik belän bäyle cinayät qılğan studentlar da bar. Tatarstan İminlek Şurasınıñ narkotiklarğa qarşı köräş buyınça komissiäseneñ küçmä utırışı Qazan däwlät universitetında ütte. Anı xökümät citäkçeläre, Prezident apparatı wäkilläre ütkärde. Soñğı yılda narkotiklarğa qarşı toru çaraların ütkärü öçen Tatarstan byudjetınnan 100 million sum aqça bülengän. Bu aqçalar tärbiä, añlatu häm däwalaw maqsatında totılğan. Berniqadär uñay näticä dä bar ikän. Soñğı waqıtta, narkomaniä belän awıruıçlarnıñ sanı uzğan yılğa qarağanda beraz kimi başlağan. Komissiä utırışında äytelgänçä, yäşlärneñ yal waqıtın oeştıru, küñel açu çaraların qamilläşterü bigräk tä möhim ikän.

Menä şulay, tärbiägä häm mädäniätkä çığımnarnı qızğansañ, ul ekonomiä yaman sotsial' awırularnı däwalawğä sarıf itelä. Xäzer respublikada narkomaniäne ciñü öçen näticäleräk çaralar kürelä. Härxäldä, milli mädäniätne üsterü, zamança mäğlümat texnologiäsen qullanu öçen kiräkle çığımnarnı cälläp torası yuk. Barıber bälä-qazalar däwlät qaznasın çistartıp kitä.

Cäy buyı, imeş, latin älifbasına küçügä, yäğni uramnarda yañaça yazmalar quyuğa, kitaplar basuğa 26 million aqça totılaçaq dip tawış kütärgän idelär. Çınlıqta bu aqçanıñ unnan bere dä sarıf itelmäde. Anıñ qarawı, yözlägän millionnar başqa maqsatlarda totılğanda, yäşlärne ruxi yaktan tärbiäläw, mädäni yaktan qamilläşterü nindi faydalı eş dip näticä yasarğa mömkin.
XS
SM
MD
LG