Accessibility links

якшәмбе, 4 декабрь 2016, Казан вакыты 05:03

1 dekaber könne Mäskäwdä «Edinstvo», «Oteçestvo», «Vsya Rossia» xäräkätläreneñ berläşü syezdı ütte


1 dekaber könne Mäskäwdä «Edinstvo», «Oteçestvo», «Vsya Rossia» xäräkätläreneñ berläşü syezdı ütte

Şuşı arada ğına Tatarstannıñ da, Rusiäneñ dä säyäsi tormışında zur häm möhim waqıyğa buldı. 1 dekaber könne Mäskäwdä «Edinstvo», «Oteçestvo» xäräkätläreneñ berläşü syezdı ütte. Anda bu xäräkätlärneñ liderları Sergey Şoyğu, Yuri Lujkov, Mintimer Şäymiev tä qatnaştılar häm çığışlar yasadılar. Ul ğına da tügel, yaña oeşqan partiäne Rusiä prezidentı Vladimir Putin da kilep qotladı. Üzeneñ qotlaw süzendä zalda utıruçılarğa möräcäğät itep ul, sezneñ töp maqsatığız — xalıqnıñ tormışın yaxşırtu bulırğa tieş, dip äytte.

Berläşü syezdında «Yedinstvo häm Otçestvo»nıñ citäkçelege dä saylandı. Partiäneñ Yuğarı sovetı räise — Rusiäneñ ğadättän tış eşlär buença ministrı Sergey Şoyğu, anıñ räistäşläre — Tatarstan prezidentı Mintimer Şäymiew häm Mäskäw merı Yuri Lujkov. Şulay uq 18 keşedän torğan Säyäsi sovet ta saylandı. Syezdda çığış yasağan Sergey Şoyğu, urtalıqta toruçı säyäsätçelär berläşep yaña partiä tözedelär häm bu partiä xaqimiätkä kiler öçen keräşäçäk, dip äytte. Şulay uq ul, bez härberebez üzebezneñ elek qaysı xäräkättän buluıbıznı onıtıp, berdäm räweştä cämğıätne Rusiä prezidentı yanında berläşterergä tieş, dide.

Mintimer Şäymiev isä çığışında, yaña partiä ber könlek kenä partiä tügel, ä citdi eşne — xalıqnıñ tormışın yakşırtunı töp maqsat itep quyğan partiä häm ul üzeneñ eşçänlegendä regional' strukturalarğa tayanırğa tieşlegen assızıqlap kitte. Bu cıelışta çığış yasawçılar küp buldı häm alar barısı da diärlek xalıqnıñ bäxete öçen üzläreneñ köçlären cällämiçä äşlärgä teläwläre turında äyttelär. Läkin çınlıqta niçek bulır ikän? Yaña partiä äğzaları federalizm, millätlär xoquqıları turında ni uylıy ikän. Bu turıda 1 dekaber könne ber närsä dä äytelmäde. Anısın xäzer waqıt qına kürsäter inde.

Şulay itep, Rusiädä yaña «Edinstvo i Oteçestvo» digän partiä dönyağa kilde. Berläşü syezdın qarağanda menä närsä küzgä taşlandı. Barlıq deputalar här kertelgän täqdimne, här äytelgän süzne bertawıştan yaklap bardılar. Partiäneñ liderları çığışların ozaq qına itep qul çabıp sälämlädelär. Bu cıelış sovet çorındağı kommunistlar partiäseneñ syezdların xäterlätte. Eşçänlege nindi bulır ikän dip kötäse genä qaldı.
XS
SM
MD
LG