Accessibility links

шимбә, 3 декабрь 2016, Казан вакыты 12:45

Tatarstan Däwlät Şurası 2002 yılğa büdjet rasladı


Tatarstan Däwlät Şurası 2002 yılğa büdjet rasladı

Şulay itep, 3 dekaberdä kiç belän Tatarstan Däwlät Şurası 2002 yılga büdjet sisteması turındagı qanunnı öçençe uqılışta tulayım qabul itte. Büdjetnı tikşerü barışında xalıq deputatları biudjetqa 169 tözätmä kertkän bulgannar. Şularnıñ 75 sessiägä qadär ük kire alıngan. Qalgannarınıñ 55 tawışqa quyarga täkdim itelgän, ä 39 kire qagılgan. Düşämbe könne biudjetnı tikşerü barışında deputatlar tagın ber qabat törle tarmaqlar, töbäklär häm saylawçılar mänfägatlären yaqlap, dälilläp karadılar. Läkin biudjetnıñ keremnär öleşe bik isäple bulganga kürä, çıgımnarnı arttıru xiç tä mömkin tügel. Şulay da, iglan itelgänçä, 2002 yılğı respublika büdjetı sotsial yünäleşle. Yagni, däwlät yärdämenä möxtac bulgan sotsial qatlamnar mänfäğätläre alga, berençe çiratqa quyıla. Şuña kürä sotsial mäsälälär, balalar häm yaşlär eşläre komissiäseneñ sotsial ölkädä eşlägän oyışmalarnı respublika büdjetına kertelergä tieşle keremgä häm milekkä salımnardan azat itü täkdime qabul itelde. Şulay uq sälamätlek saqlawğa digän çıgımnar da 4 tapqır arttırıldı. Şundıy iñ kiräkle tözätmälärne genä qabul itkännän soñ respublika büdjetınıñ defitsitı 2 milliard 222 million rubl çaması bulıp, mömkin bulgan çiktän älläni artmadı. Sessiä tänäfeslärendä häm sessiädän soñ, xätta, tözätmäläre kire qagılgan deputatlar da büdjettan qänäğät buluları turında äyttelär. Çönki ul, çınnan da, 7 qat ülçäp, ber qat kiselgän real keremnärgä isäp totıp, häm çıgımnarnı iñ kirägenä genä totıp yäşi torgan büdjet bulıp çıqtı. Çönki Tatarstan federal üzäk belän yaña mönäsäbätlär çorına kerä. Respublikada cıyılgan salımnar häm aksizlarnıñ yaqınça 65 protsentı federal qaznaga kitep toraçaq. Döres, Rusiä xökümäte respublika xälenä kerep, Tatarstannıñ sotsial-iqtisadi üseşeneñ maxsus federal programmasın rasladı. Anıñ buyınça 2006 yılga xätle federal büdjettan barlıgı 60 milliard rubl birep torırga tieş. 2002 yılga bireläse öleş 12 milliard rubl çaması. Bu büdjetınıñ kerem öleşeneñ 1/3 täşkil itä. Belgeçlär Rusiä büdjetında qaralagan şuşı akçalarnıñ yazmışı äle bilgesez, dilär. Bu, berençe çiratta, neftkä dönya bäyäläreneñ qay yaqqa üzgärüennän tora.
XS
SM
MD
LG