Accessibility links

якшәмбе, 11 декабрь 2016, Казан вакыты 11:06

Sessiädä säyäsi mäsälälär kütärelde


Sessiädä säyäsi mäsälälär kütärelde

2002 yılga büdjet sisteması qabul itkän sessiä kön tärtibenä säyäsi mäsälälär dä quyıldı. Ğadät buyınça, Däwlät Şurasınıñ xäzerge sostavındagı berdän-ber oppozitsioner Aleksandr Ştanin kön tärtibenä Tatarstan Konstitutsiäsendäge üzgäreşlärne tikşerüne quyarga täkdim itte. Ul üzeneñ çıgışında maxsus buldırılgan komissiäne eşsezlektä, initsiativasızlıqta ğäyepläde. Konstitutsiä komissiäse räise Prezident Mintimer Şäymiev bu dägwanıñ yasalma uylap çıgarılgan buluın şunda uq deputatlarga añlatıp birde. Eş şunda ki, Aleksandr Ştanin citäklägän «Ravnopravie i zakonnost» ictimaği oyışması qabat-qabat Tatarstan parlamentınıñ legitim bulmawı turında şiqäyätne mäxkämägä birä. Mäxkämä eşe äle tämamlanmagan. Bu eş barlıq instantsiälärne genä uzgaç, Tatarstan Konstitutsiäse turındagı mäsäläne quzgatırga bula, dip iskärtte tagın ber kat Aleksandr Ştaninga Prezident.

Tagın şunısı da bar, sişämbe könne Mäskäwdä Tatarstan qanunnarı buyınça Rusiä Yuğarı mäxkämäse utırışı ütä. Anda Rusiä prokuraturası protestlagan qanunnar buyınça Tatarstan Yuğarı mäxkämäse qararına Tatarstan Däwlät Şurası räise Färit Möxämmätşinnıñ kassatsion şikäyäte tikşerelä. Tatarstan qanunnarı häm parlamentı menä şulay mäxkämälär arasında yörtelä äle. Şuña kürä Aleksandr Ştaninnıñ täkdime kön tärtibenä kertelmäde.

Ä menä deputat Tufan Miñnullinnıñ Rusiä DäWlät Dumasında xalıq sanın alu turındagı Qanun proyektı qabul itkändä, mäglüm bulgan ber yaman xäl — tatar milläten altı törgä bülügä qarata möräcägat qabul itü täkdime kön tärtibenä kertelde. Kön tärtibenä kertelgän älege mäsälä buyınça notıqnı da Tufan Miñnullin yasadı.

Tatarstan Däwlät Şurası tatar xalqına häm Rusiä Däwlät Dumasına möräcägätne nigezdä qabul itte. Xäzerge waqitta Däwlät Şurasınıñ milli mäsälälär, mädäniät häm mägarif komissiäsendä möräcägatlärneñ tägäyenlängän tekstları äzerlänä.
XS
SM
MD
LG