Accessibility links

сишәмбе, 6 декабрь 2016, Казан вакыты 05:56

Rusiä saqlanu ministrı Sergey İvanovnıñ Tatarstan säfäre


Rusiä saqlanu ministrı Sergey İvanovnıñ Tatarstan säfäre

Rusiä saqlanu ministrı Sergey İvanovnıñ çärşämbe könne Tatarstanğa vizitı çın mäğnäsendä eşlekle buldı. Anıñ vizitı yartı eş köne genä däwam itte. Ul kilüe belän Gorbunov isemendäge Qazan aviatözeleş berläşmäsendä citeşterelgän texnika belän tanışıp çıqtı. Şuşında ul jurnalistlarğa, min qurıqmıyça, Tatarstan Rusiä xärbi- sänäğät kompleksında möhim rol' uynıy, dip äytä alam, dide. Anıñ fikerençä, Tatarstan xärbi-sänäğät kompleksınıñ saqlanu şirkätlären häm fänni texnik bazasın saqlap qala alğan. Rusiä xökümäte tulaem xärbi-sänäğät kompleksı belän citdi şöğıllänergä niätli, axrı. Rusiä saqlanu ministrı 2002 yılğa Rusiä byudjetında fänni ezlänülär häm täcribägä, şulay uq yaña xärbi texniqa buldıruğa çığımnar 28 milliard rubl'gä xätle arttırıla, dide. Şunıñ belän ul Tatarstanğa kilü maqsatların añlatu işaräse yasadı.

Ber kön genä alda Rusiä Prezidentı Vladimir Putinnıñ Severodvinskiyğa barıp, iñ yaña «Gepard» su astı köymäsen ekspluatatsiägä tapşıruda şäxsän qatnaşuı da Rusiä citäkçelegeneñ xärbi-sänäğät kompleksı belän citdi şöğıllänüen kürsätä. Rusiä saqlanu ministrı Sergey İvanovnıñ Qazanda Tatarstan Prezidentı belän oçraşu waqıtında ul dönya xälläre turında da fikerlären äytte.

Berençe çiratta, jurnalistlar Äfğanstan tiräsendäge mäs'älälär buença sorawlar birdelär. Küptän tügel Bonda Äfğanstanda waqıtlı xökümät buldıru turındağı kileşü imzalawğa qarata häm şulay uq bu ilgä Berläşkän millätlär oeşması ximayäsendä xalıqara tınıçlıq urnaştıru köçläre yunälterügä qarata Sergey İvanov jurnalistlar birgän sorawğa tağın ber tapqır Rusiä pozitsiäsen añlattı. Rusiä Äfğanstanda barlıq xalıqlarnıñ häm etnik törkemnär wäkilläre kergän kiñ koalitsion xökümät buldıru yağında. Rusiä soldatlarınıñ tınıçlıq urnaştıruçı kontingentta qatnaşuına qarata ul Rusiä Äfğanstanğa bernindi bayraq astında da, bernindi dä xärbi kontingentlar yunäldermäyäçäk, dide. Rusiä Äfğanstanğa gumanitar yärdäm qulı suzarğa äzer.
XS
SM
MD
LG