Accessibility links

Кайнар хәбәр

Tatarstanda İslam sänğatenä bağışlanğan olı çaralar ütä


Tatarstanda İslam sänğatenä bağışlanğan olı çaralar ütä

Xäbär itkänebezçä, bu könnärdä Qazannıñ tür başında İslam sänğate, İslam teması. Qazanda Sankt-Peterburgtağı Däwlät Ermitaj muzeenıñ «İslam sänğate» digän kürgäzmäse açıluı, çınnan da, törle millät zıyalıların, törle konfessiälärne berläşterü, kileşterü çarasına äwerelde. Xäbär itkänebezçä, kürgäzmä açu tantanasında Ermitaj direktorı, akademik Mixail Piotrovskiy, däwlät, Qazan xakimiäte citäkçeläre, törle konfessiä ruxaniları qatnaştılar. Ermitajdan Qazanğa 145 tarixi eksponat kiterelde. Alar arasında iñ borınğısı VII ğasırğa turı kilä. Alarnıñ tarixi qimmäte turında şuşı eksponatlar arasındağı ber qıypılçıqnıñ iminlek bäyäse 30,000 dollar çaması buluı turında äytü dä citäder. Kürgäzmä belän tanışqaç, möfti Ğosman İsxaqıy üz täesirläre turında bolay dide:

Kürep torabız, möselman bulmağan keşelär kilep monda, bezneñ cömhüriätebezdä, bezneñ başqalabızda İslamnıñ tarixın häm dä İslamnıñ Auropağa häm başqa illärgä nindi sivilizatsiäne kertkäne xaqında söylilär. Bu bit xaqlıqnıñ östen çığuı. Bezgä ällä närsä uylap çığarırğa kiräkmi, bezgä İslamnı öyränergä, anıñ güzällegen, anıñ kürkämlegen ğamälgä aşırırğa — şul ğına bezneñ burıç.

Kürgäzmä açu tantanasında qatnaşqan Tarix institutı direktorı Rafail Xäkimov Ermitaj belän Tatarstan arasında İslam sänğaten öyränü ölkäsendä xezmättäşlek däwam itäçäk, dide. Kiläçäktä Qazanda Ermitajnıñ kürgäzmä üzägen buldıru proektı barlığın da äytte. Pänceşämbe könne Qazan milli-mädäni üzägendä «İslam sänğate İdel-Ural töbägendä» digän fänni simpozium bardı.
XS
SM
MD
LG