Accessibility links

шимбә, 3 декабрь 2016, Казан вакыты 14:38

Surgutta tatar mädäniäte könnäre ütä


Surgutta tatar mädäniäte könnäre ütä

15 ğinwarda Xantı-Mansi avtonomiäle okrugında tatar mädäniäte könnäre başlanıp kitte. Şuşı könnär qısalıranda Surgut, Nefteyugansk, Nijnevartovsk şähärlärendä küp kenä milli çaralar ütkärelä. Alarnı Xantı-Mansi avtonomiäle okrugınıñ tatar milli-mädäni avtonomiäse häm Tatarstannıñ okrugtağı säwdä wäkilçelege oyıştırğan. Tatar mädäniäte könnäre 18 ğınwarğa qädär däwam itäçäk. Bu waqiğa Tatarstannıñ mädäniät ministrlığı belän Surgut şähäre administratsiäse arasındağı mädäni xezmättäşlek turındağı kileşü imzalanuğa 7 yıl tulu uñaennan ütkärelä. Qazannan şuşı çaralarda qatnaşu öçen Tatarstannıñ mädäniät ministrı urınbasarı Ayrat äfände Cabbarov kilgän. Şulay uq tatar mädäniäte könnärendä qatnaşu niäte belän Surgutqa Tatarstannıñ däwlät cır häm biyü ansamble dä kilde. Alar millättäşlärebezne tatar sänğäteneñ iñ kürkäm bizäkläre belän söyenderäçäk.

Bu yaklarda tatarlar şaqtıy ğına yäşi. Xantı-Mansi okrugı Tatarstannan şaqtıy yıraqta urnaşqan buluına qaramastan, mondağı millättäşlärebez dä tuğan tellären, ğoref-gädätlären, mädäniätne onıtmıylar. Şuña kürä ölkädä milli-mädäni avtonomiä, ictimağıy oyışmalar eşläp kilä, äledän-äle törle milli çaralar ütkärelä. Tatarstannan kilgän qunaqlarğa da millättäşlärebez şuşı turıda söylädelär, alarğa Nefteyugansk şähärendäge mäçetne kürsättelär, Nijnevartovsktağı yäkşämbe mäktäbenä, şuşında uq urnaşqan balalar baqçasındağı tatar törkemenä qunaqqa alıp bardılar. Pänceşämbe könne mädäniät könnäre programmasında Nijnevartovsk şähäreneñ merı Timoşkov, Surgut başlığı Sidorov belän oçraşular da qaralğan.

Bu xaqta «Azatlıq» tıñlawçılarına Tatarstannıñ Surguttağı säwdä wäkilçelege xezmätkäre Albina Ziganşina äytte: (audio)

Xantı-Mansi okrugindağı tatar mädäniäte könnäre 15 ğınwarda başlanıp kitte. Surgutqa Tatarstannan däwlät cır häm biyü ansamble kilde. Alar bezdä berniçä konsert biräçäklär. Bezneñ okrugta 3 meñnän artıq tatar yäşi. Bezdä tatar mädäniäte üzäge, mäçetlär, fol’klor ansambl’läre bar.

Şuşı könnärdä yıraq cirlärdän Qazanğa tağın ber xäbär kilep ireşte. Yaqutiä respublikasınıñ yäş zıyalılar klubı häm berniçä yuğarı uqu yortlarınıñ studentları häm aspirantları oyışmaları «21 ğasırda yäşlärneñ yaña çikläre» proyektı qısalarında aprel ayı başında Tatarstanğa säyäxät qılarğa niät itälär. Yaqutiä yäşläre wäkilläre Tatarstannıñ yäşlär oyışmaları belän xezmättäşlek itärgä, respublikanıñ tarixın, tatarlarnıñ mädäniäten, ğoref-gädätlären öyränergä, bergäläşep törle çaralar ütkärü turında söyläşer öçen Qazanğa kilmäkçelär ikän. 10 yıl eçendä suveren Tatarstan iqtisadi, säyäsi yaqtan da bezneñ öçen ürnäk bulırlıq respublikağa äwerelde. Şunıñ öçen bez sezneñ tormış belän yaqınraq tanışırğa telibez, dip äytelä Yaqutiädän kilgän xatta.
XS
SM
MD
LG