Accessibility links

шимбә, 10 декабрь 2016, Казан вакыты 06:09

2002 yılda Rusiädä xalıq sanın alu uñayınnan Tatarstan parlamentı tatar xalqına…


2002 yılda Rusiädä xalıq sanın alu uñayınnan Tatarstan parlamentı tatar xalqına…

İnde xäbär itkänebezçä, 17 ğınwarda Tatarstan Däwlät Şurasınıñ 10 nçı plenar sessiäse eşen däwam itte. Deputatlar tatar milläten borçığan möhim ber mäsälägä ayıruça iğtibar birdelär. 2002 yılda Rusiädä xalıq sanın alu uñayınnan alar tatar xalqına häm Rusiä citäkçelärenä möräcäğätlär qabul ittelär. Nigezdä dokumentlarnıñ eçtälege oxşaş. Millättäşlärebezgä yullağan möräcäğättä, Däwlät Şurası xalıq sanın isäpkä alu üñayınnan Duma qabul itkän zakonnı xuplıy. Şul uq waqıtta bu ğamäldä faydalanu öçen Rusiä Fännär akademiäseneñ etnologiä häm antropologiä institutı tarafınnan äzerlängän dokumentlar proeyktı xalıq deputatlarında häm cämäğätçelektä rizasızlıq tudıra, dielä.

«Bu dokumentlar proyektları berdäm tatar milläten bernindi fänni nigezläwsez, yasalma räweştä berniçä ayırım millätlärgä waqlawnı küzdä tota. Şulay itep, älege dokumentlar avtorları küp ğasırlar däwamında ber xalıq bulıp oyışqan tatar milläten primitiv qabiläçelek çorına qaytarırğa mataşalar». Sitata tämam.

Respublika parlamentı waqığalarnıñ mondıy räweş aluı tatar xalqına ğına tügel, ä Rusiä cämğiätendäge häm däwlätendäge millätara mönäsäbätlärneñ totrıqlılığına qurqınıç yanıy, dip sanıy. Möräcäğättä äytelgänçä, älege dokumentlar Rusiä Federatsiäse xökümäte tarafınnan raslanğan oçraqta üz berdämlegen saqlap qalu yulında tatar milläten awır sınawlar kötä, bügenge köndä san yağınnan Rusiädä ikençe urındağı tatar xalqına yuqqa çığu qurqınıçı yanıy. Bu tarixi sınaw könnärendä härkem tirän uylansın, üz milläteneñ bötenlege öçen cawaplılığın onıtmasın ide.

Deputatlar törle cämäğät oyışmaların, yazuçılarnı, ğalimnärne, din ähellären, däwlät eşleklelären millätne waqlaw säyäsetenä qarşı töple süzlären äyterlär, watandaşlarına tatar xalqıbıznıñ berdämlegen nığıtu turında möräcäğät itärlär, dip ışanalar.

Möräcäğättä ata-babalarnı, tarixi tamırların onıtqan xalıqnıñ kiläçäge yuq, tatar xalqı berdäm bulğanda ğına millätneñ köçen, bay mädäniäten saqlap qala alaçaq, dielä.

Tatarstan Däwlät Şurası tatar xalqı bulır, tarixi berdäm millät ikänen härwaqıt istä totar, 2002 yılda xalıq sanın alu näticäsendä dä üzeneñ bülenmäslegen häm berdämlegen raslar, dip ışana.
XS
SM
MD
LG