Accessibility links

шимбә, 10 декабрь 2016, Казан вакыты 15:59

Mintimer Şäymievqa 65 yäş tuldı. Bu waqiğa Tatarstanda niçek bäyräm itelde?


20 ğinwar könen Tatarstanda nindider dähşät häm dulqınlanu belän köttelär. Bigräk tä, citäkçe urında eşläwçelär, apparat xezmätkärläre. Soñğı 13 yılda Tatarstannı citäklägän Mintimer Şäymievneñ tuğan köne gädäti waqiğa tügel. Xäzerge zaman cirle säyäsätçelär häm çinovniklar näq şuşı waqıtta Şäymiev epoxasında nıqlap ayaqqa basqan. Alarnıñ yazmışı Tatarstannıñ berençe Prezidentı belän bäyle. Xättä, Şäymiev zamanında yuğarıraq kütärelergä ömetlänmäwçe yarım yäşeren oppozitsiä dä, Babaynıñ yazmışına bitaraf tügel. Şäymievnıñ säyäsi biografiäse niçek tämamlanır, ikençe törle äytkändä, Tatarstannıñ kiläçäge nindi bulır, dip baş watuçılar, xättä Mäskäw taraflarında da az tügel. Citmäsä, şuşı könnärdä, Rusiäneñ konstitutsion mäxqamäsendä, Tatarstannıñ töp qanunına yäsin çığalar. Şuşı cawaplı könnärdä Mintimer Şäymievnıñ eşçänlegenä yomğaq yasap, bügenge qaraşların dönyağa işetterü, jurnalistlarğa da qızıq bulır ide.

Qaysı türä nindi matur süzlär äyter, nindi büläklär tapşırır. Bügen Qazan Kreml'endä kemnär söyekle häm qäderle, ä kemnärgä kiresençä — işeklär yabıq. Mintimer Şäymiev niçek bäyälänä häm ul üze kemgä nindi bäyä birä? Menä bit nindi qızıqlı sorawlarğa 21 ğinwar könne cawap tabılırğa tieş ide.

Ni qızğanıç, bu sorawlar yañğıramadı häm alarğa cawap ta yuq. Üzeneñ yubileyena 2 kön qalğaç, Tatarstan Prezidentı yuqqa çıqtı. Xättä Däwlät Şurasınıñ Plenar utırışında da Prezidentnıñ qatnaşmawı küzgä taşlandı. Pänceşämbe kiçendä, Mintimer Şäymievnıñ Ufada Başqortostan Prezidentı Mortaza Räximov belän oçraşuwı häm anda ike respublikanıñ üzara xezmättäşlege turında söyläşülär alıp baruwı turında qısqa ğına räsmi xäbär çıqtı. Şunda uq, Tatarstan Prezidentı Könyak Uralda qısqa mötdätle yal ütkäräçäk, dip äytelde. Şulay itep, 65 yäşe tulğan könne M.Şäymiev Başqortostan belän Çiläbe ölkäse çigendä urnaşqan «Yanğan taw» sanatoriyenda qarşılıy. Küpme çäçäk, matur süz, zinnätle büläk Qazan Kremle xucasına tapşırılmıy qaldı.

Respubliqa gäzitläreneñ şimbä sanında Mintimer Şäymiew turında tıynaq qına ber-ike mäqälä kürende. Prezidentı zurlaw, anıñ tärcemäi xälen kürsätü küzgä taşlanmadı. «Конец недели», yäğni «Вечерняя Казань» gäziteneñ şimbä çığarılışında Prezidentnıñ iseme, yäki süräte kürenmäde. Tatar gäzitlärendä Prezidentqa xatlar, möräcäğätlär basıldı.

«Tatarstan» televideniesendä häm radiosında elekke yıllarda Mintimer Şäymiev belän bergä eşlägän şäxeslärneñ xätiräläre häm yaratqan cırları yañğıradı. Barı tik ber genä muzıkal' äsärneñ eçtälege konkret şäxesne xäterlätte. Şağir Ğosman Sadä häm kompozitor Saf'yan İbrahimov uzğan prezident saylaw yılında icat itkän yaña cırnı Ğazinur Faruqşin başqara. Televideniädä bu cır kürsätelgändä, Aqtanış rayonı basuları, «Nur Bayan» kolxozınıñ basu qapqası küzgä çalındı. Saban tuyları, awıl xalqınıñ quanıç-ömetläre häm Ğazinur Faruqşinnıñ qardäşläre ekranda ide. «İlbaşı» dip atalğan bu cır ayırım şäxes turında tügel, ä tatar xalqınıñ tarixı häm kiläçäge xaqında kilep çıqqan. Monıñ öçen xätta şağir Ğosman Sadägä maxsus möräcäğät itep, şiğerneñ ber yulındağı «Mintimere» digän süzne töşerep qaldırırğa täqdim itkännär. Şağir monı tıñlap «qaharmanı» digän süz kertkän. Ğomümän, tatarğa ilbaşları, yul kürsätüçelär, tuplawçılar kiräk, xalıq beraz töşenkelekkä birelgän çorda bigräk tä.

Tatarstan prezidentınıñ tuğan könen zurlap ütkärmäw, mäcleslärdä sıylanmaw ber dä käyefne töşermäde. Ğomumän äytkändä, xätta urta qul zavod yäki bank citäkçelärneñ yubileye, ayırım firma, institut bäyrämnäre ğadättän-tış şaw-şu quptarıp, ozaqqa suzılğan mäcleslär, tantanalı zallarda cırlı-biyüle kiçälär ğadätkä kerep bara. Bäyälär 30-40-50% artıp torğan zamanda, andıy qılanışlar fäqirlärneñ açuwın qabarta.
XS
SM
MD
LG