Sişämbe kiçendä Rusiä Konstitutsiä mäxkämäse Tatarstan parlamentınıñ yazmışın xäl itäçäk

Bu qararda şaqtıy üzgäreşlär kötelä. Äytik, rayon administratsiäse başlıqlarına ikesennän berne saylarğa turı kiläçäk: yä başlıq, yä deputat bulıp qalırğa. Monıñ xaqında sişämbe könne Tatarstan radiosınıñ turı efirında Tatarstan Däwlät Şurasınıñ zakon çığaru, zakonçılıq, reglament häm deputat etikası komissiäse räise Midxät Kormanov äytte. Radiotıñlawçılar 2002 yılda bulaçaq Bötenrusiä xalıq sanın alu uñayınnan Däwlät Şurasınıñ Tatar xalqına yasağan möräcäğäte turında da sorawlar birde. Midxät Kormanov tatar milläten bülgäläwne kiläçäkne küzzalamıy torğan säyäsät, dip bäyäläde. Älbättä, ul nindider maqsatlar quya. Läkin Midxät Kormanov äytüençä, Rusiä federativ däwlät häm anıñ däwlät nigezen milli respublikalar täşkil itä. Şuña kürä millätlärne bülgäläw şuşı milli respublikalarda yäşäwçe millätlärgä qarşı qılınğan ğamäl.