Accessibility links

якшәмбе, 4 декабрь 2016, Казан вакыты 23:37

Qazanda ğalim, türkolog Räşit Räxmäti Aratqa bağışlanğan kitap dönya kürde


Qazanda ğalim, türkolog Räşit Räxmäti Aratqa bağışlanğan kitap dönya kürde

Şuşı arada ğına Qazanda «XX ğasırnıñ kürenekle türkoloğı Räşit Räxmäti Arat» digän kitap basılıp çıqtı. Ul Törkiädä yäşäp, ataqlı ğalim bulğan, böten dönyağa tanılğan millättäşebez Räşit Xismättula ulı Räxmätigä bağışlanğan. Bu cıyıntıq tatar filologiäse häm tarixı belän qızıqsınuçılarnıñ iğtibarın cälep itär, älbättä. Şunısın da äytep ütärgä kiräk, bu kitap Qazanda çıqsa da, latin imlasında basılğan. Şuña da inde, ul latin imlasında näşer itelgän berençe fänni kitap bulıp tora.

Şuşı yaña kitap turında tulıraq mäğlümät alır öçen bez Tatarstan Fännär akademiäseneñ Tel, ädäbiät häm sänğät institutı ğalime, cıyıntıqnı äzerläwçe İlbaris Nadırovqa möräcäğät ittek. «Azatlıq» radiosına ul menä närsälär söyläde:

Bu kitap 3 kisäktän tora. Anda Räşit Räxmäti Aratnıñ tormışı, fänni eşçänlege turında söylänä. Kitapni äzerläwdä Tatarstan, Törkiä ğalimnäre qatnaştı.

İlbaris äfände Räşit Räxmätineñ tormışı häm anıñ ğilmi eşläre xaqında mäğlümätlär citkerde:

Räşit Räxmäti Arat 1900 yılda xäzerge Tatarstan cirendä tuğan. Annarı Qazağstanga kitkän. Anda mädräsädä uqığan. Yuğarı belem alu öçen Germaniägä kitkän. Anda küp kenä fänni mäqälälär yazğan. 60 yıllardan başlap Törkiädä yäşägän häm uqıtqan. Ul bik küp türkologlar öçen ähämiätle fänni eşlär yazğan ğalim.

İlbaris äfände şulay uq Törkiädä eşläp kilüçe Äxmätwäli Mängärle waqıfınıñ Tatarstandağı wäkile dä. Äytep ütärgä kiräk, tatar fänen, mädäniäten üsterüdä bu waqıfnıñ da öleşe zur. Şuşı kitap ta Mäñgärle fondınıñ matdi yärdäme belän bastırılğan. İlbaris Nadırov süzlärenä qarağanda, soñğı berniçä yıl eçendä genä dä bu waqıf Qazanda 8, Mäskäwdä 2 tatarça kitap çığaruda bulışlıq itkän.
XS
SM
MD
LG