Accessibility links

җомга, 9 декабрь 2016, Казан вакыты 18:29

Qazanda eçkeçelekkä qarşı qorıltay ütte


Qazanda eçkeçelekkä qarşı qorıltay ütte

Şimbä könne Qazanda araqı, xämergä qarşı zur aksiä ütkärelde. Rusiäneñ törle töbäklärennän häm Mäskäwdän kilgän säyäsätçelär, cämäğät eşlekleläre araqı satunı häm eçüne kimetügä qarşı köräşä torğan xäräkät cäyelderelergä telilär. Cıyılış ütkän zalda Tatarstan gerbı yanında pravoslav ikonalar da quyılğan ide. Xalıq demokratik partiäseneñ citäkçese Sergey Baburin xäzerge Rusiä xaqimiäten xalıqnı isertüdä bik qatı ğäyepläp çıqtı. Byudjetnıñ zur öleşen araqı häm sıra satu xisabına tulılandıru berkemgä dä ser tügel. Tatarstan da bu mäsälädä artta qalmıy. Döresräge, araqı satqanda Tatarstan spirt zavodları Mäskäwneñ «Gjelka»sına häm Samaranıñ «Rodnik»ına bireşmäskä tırışa. Ä sıra çığaruda häm satuda Tatarstannıñ «Qızıl Şärıq» şirkate şaqtıy alda bara. Niqädär kübräk xämer, sıra eçsäñ, şul qädär ük däräcädä qazna tulılana, däwlät bayıy. Ä cıyılğan aqçalar sotsial' mäsälälärne xäl itügä, keşelärneñ eçep qaqşağan sälämätlegen nığıtuğa citärme ikän soñ? Araqı, sıranı çığarmasañ särxüşlär teläsä nindi ağu eçep yuldan çığa. Uzğan yılda 350-läp keşe sıyfatsız araqıdan ağulanıp dönya quydı. Şunısı beraz şomlandıra. Eçkeçelekkä, araqığa qarşı köräşne Rusiäneñ sul partiäläre, üzlären patriot dip atağan derjavaçılar başlap cibärgän. Xäzer inde xättä ayıqlıq buyınça da, äxlaqlı, möselman dip sanalğan tatarlarnı Mäskäwdän kilep urıs säyäsätçeläre oyıştırıp yörilär.

Säyäsättä dä federal' üzäkneñ qubızına biyü ğädäti xäl. Şimbä könne Tatarstan kompartiäseneñ cıyılışı buldı. Anda şuşı partiä üzen KPRF — Rusiä kommunistları partiäseneñ respublika bülekçäse statusın alırğa buldı. Rusiädäge partiälär turındağı qanun şunı täläp itä. Töbäklärdä partiälär bula almıy, bik teläsälär ğomümrusiä firkäsenä quşılıp bula. Tatarstan kommunistları oyışmasınıñ 15 meñ äğzası bar. Alarnıñ küpçelege — ölkän buın wäkilläre.
XS
SM
MD
LG