Accessibility links

дүшәмбе, 5 декабрь 2016, Казан вакыты 05:40

Tatarstanda 900-dän artıq suqbay bala terkälgän


Tatarstanda 900-dän artıq suqbay bala terkälgän

Prezident Putin çığışınnan soñ Rusiädä suqbay balalarğa bik küp iğtibar yünälde. Kem genä söylämi alar turında xäzer, kem genä bu balalarnıñ yazmışı belän körsenmi. Xäyer, älegä alarnıñ tormışın üzgärtü öçen ğämällär qıluçılar barıber ällä ni küp tügel. Tatarstanda da bu problema bar, bigräk tä şähärlärdä. Şuña kürä, Qazanda da bu mäsälädä qalışmasqa buldılar. Eçke eşlär, mäğärif, sotsial' yaqlaw, yäşlär eşläre ministrlıqları aktiv eşkä kereşte. Sişämbe könne Ministrlar Kabinetında balalar arasında suqbaylıqnı buldırmawğa qarşı digän tema astında brifing ütte. Şunda qatnaşqan Eçke eşlär ministrlığı wäkile süzlärenä qarağanda, Tatarstanda 2001 yılda 900 artıq suqbay bala terkälgän. Şunıñ östäwenä, respublikada 625 soranuçı bala bar, 11 meñnän artıq yäşüsmer Eçke eşlär ministrlığı qaramağında tora ikän. Şul 11 meñneñ yartısı — törle problemalı ğailälärdän.

Küp kenä balalar öydäge naçar tormıştan, eçüçe, alarnı cäberläwçe ata-analardan uramğa qaçarğa mäcbür. Alarnıñ tormışın yaxşırtır öçen närsälär eşlärgä mömkin soñ? Häm bu ğämällärne kem eşlärgä tieş? Eçke eşlär ministrlığı, mäsälän, inde berniçä täqdim dä kertkän. Şularnıñ berse — uramda yäşi torğan balalar öçen priyut — waqıtlıça toru urınnarın, balalarğa sotsial' yärdäm kürsätü üzäklären buldıru. Bu häm başqa täqdimnär inde Tatarstan xökümätenä citkerelgän. Ä Tübän Kamada uñışlı ğına eşläp kilüçe ber şundıy üzäk bar. «Balqış» isemle bü üzäkneñ eşçänlege yaxşı näticälär birä. Sotsial' yaqlaw ministrı urınbasarı Yuri Kamaltınov äytüenä qarağanda, Qazanda da tizdän suqbay balalar öçen 50 keşene sıyındırırlıq ber priyut açılaçaq.

Putin xäzer bik yış qına berär çığış yasıy häm anı ayırım temağa bağışlıy. Şularnıñ tağın bersendä Rusiä xalqınıñ sälämätlege, fizik xäle naçarayuı turında äytelde. Şuşı uñaydan prezident tiz arada kiräkle çaralar kürergä täqdim itte. Axırı älege çığışnı küz aldında totıp sişämbe kiçen Tatarstan televideniäsendä xalıqnı sälämätländerügä bağışlanğan tapşıru bulıp uzdı. Anda studiägä çaqırılğan qunaqlar Tatarstan xalqın sälämätländerü ölkäsendä eşlänä torğan eşlär turında söylädelär, tamaşaçılarnıñ sorawlarına cawap birdelär. Turı elemtä waqıtında süz kübräk ğadi xalıq yaratqan xokkey, köräş, çañğı şuular turında bardı. Ä menä Putin yarata torğan häm şuşı nisbättän Rusiädä soñğı arada bik populyarlaşıp kitkän tawdan şua torğan çañğılarnıñ respublikadağı taraluı belän ällä ni qızıqsınmadılar. Ä bit Tatarstanda da bu sport töre qayberäwlärneñ şaqtıy ğına zur qızıqsınuın uyatqan. Xättä bu çañğılarda şuıp zıyan kürüçelär dä bar digän süzlär yöri. Nişliseñ, bu tennis qına tügel şul.
XS
SM
MD
LG