Accessibility links

Zamana kommunistları


Zamana kommunistları

Tatarstan komunistları küptän tügel qorıltay uzdırdılar häm Rusiä kompartiäseneñ töbäktäge bülege bulıp qaldılar. Tatarstan leninçıların kiläçäktä dä Däwlät Duması deputatı Aleksandr Saliy citäkläyäçäk. Wöcdanıñ sabıylarnıñ küz yäşe kebek çista bulırğa tieş, digänräk mäğnädä söylärgä yaratqan Saliy turında soñğı arada kötelmägänräk xäbärlär işetelä başladı.

Menä, mäsälän, küptän tügel iptäş Saliy Qazannıñ iñ yaxşı restorannarınıñ bersendä 50 yıllıq yubileyın uzdırğan. Ber-işe xäbärlärgä qarağanda, tıynaq kommunistlar şäp kenä küñel açqannar, tiptergännär. Öställär mul bulğan, aqçanı ällä ni sanap tormağannar. Tuğan könnärne uzdıru — tabiğıy närsä, demokratmı sin, kommunistmı — waqıt qarşında barabız da ber tigez. Häm oşbu waqığağa igtibar da itmäs idek, ägär dä «Московский комсомолец» gäzite Aleksandr Saliy turında ğacäplänerlek närsälär yazıp çıqmasa. Şul basmanıñ bıyıl çıqqan 5-nçe sanında tanılğan jurnalist Aleksandr Xinşteyn «Бомба для губернатора» digän mäqälä urnaştırdı.

Anda süz Mäskäw ölkäsendäge saylaw kompaniäsendäge äkämätlär turında bara. Mäğlüm ki, Rusiädä här töbäktä diärlek saylawlar häm ığı-zığılar ber suqmaqtan yänäşä baralar. Mäqälädä avtor gubernator Boris Gromov yärdämendä ölkä Dumasına uzğan saylawlardağı pıçraq texnologiälärneñ kuxnyasın faş itä. Häm menä siña mä — älege kuxnyada bezgä tanış keşelär päyda bula. Aleksandr Saliy häm anıñ yärdämçese, elekkege Duma deputatı, kommunist Näsimä Stolyarova. Qısqası, bezneñ qızıl yaqtaşlarıbız älege häm başqa saylawlardan säyäsi tügel, matdi fayda çığaru yulların uylap tapqannar. «Московский комсомолец» jurnalistı fikerençä, süz zur aqçalar turında bara. Ä bit bez Aleksandr Saliynı saylawlar barışında kilep çıqqan qanun bozular, xärämläşülär belän köräşüçe, dip yöribez. Härxäldä, Däwlät Dumasında ul näq şul mäsäläne tikşerüçe komissiä belän citäkçelek itä. Tatarstanda uzğan här saylaw kompaniäläreneñ pıçraqlığın böten Rusiä xalqı aldında faş itüçelärneñ berse dä äle ul Aleksandr Saliy. Küräseñ, köräşçe temanıñ böten neçkäleklären tiränten öyränep, üze dä şul uq mäker eşkä kereşkän. Xäer, bez monı raslarğa alınmıybız.

Pänceşämbedä «Эфир» telekompaniäse jurnalistı «Московский комсомолец»ta dönya kürgän nizağlı mäqälä xaqında Aleksandr Saliynıñ üzenä şaltırattı. «Bez gazeta belän äle mäxqämäläşäbez», — digänräk mäğnädä cawap birde ul «Эфир» jurnalistına. Ällä elemtä naçar, ällä dälillär yomşaq bulğanğa, bu yulı kommunistik mitinglarda şomarğan oratornıñ tawışı ışandırırlıq häm kör yañğıramadı.
XS
SM
MD
LG