Accessibility links

сишәмбе, 6 декабрь 2016, Казан вакыты 13:21

Qaçqın xärbilär Bua rayonında totqarlaw waqıtında häläk buldı


Qaçqın xärbilär Bua rayonında totqarlaw waqıtında häläk buldı

İnde xäbär itkänebezçä, Tatarstanda, Bua rayonında qotoçqıç faciğa buldı. 4 fevral' könne Sember yanında urnaşqan 31-nçe xärbi hawa brigadasınnan qaçıp kitkän ike soldat ike militsiä xezmätkären häm ike sivil keşene atıp üterde. Böten Tatarstan militsiäse ayaqqa bastırıldı. Soldatlarnı totu operatsiäse belän eçke eşlär ministrı urınbasarı general Rinat Timercanov citäkçelek itte. Qaçqınnarnıñ berse Penzadan xärbi xezmätkä alınğan Mixail Suxorukov, ikençese - Yäşel Üzän rayonındağı Vasil'yevo bistäsennän Almaz Şağiyıv, digän xäbär kilde. Qaçqınnarnıñ Ulyanovskiy ölkäsendä dä avtomobil' yawlap alğanda, ber keşene ütergännäre mäğlüm buldı. Şulay itep, militsiä xezmätkärläre konkret kemne ezlärgä, kem belän eş itärgä turı kilgänen belep xäräkät itä başladı.

4 fevral' könne qaçqınnarnı Bua yanındağı Laşçi stansiäse yanında taptılar. Läkin Rusiä armiäseneñ zamança desantçıları tiz genä birelmäde. Qayber çığanaqlarğa qarağanda, alar monda da Hollywood blokbasterlarınnan ber süjet «uynap kürsätkän». Berse birelergä dip qulların kütärep çıqqan bulıp qılanğan, ikençese birelergä çıqqan soldat yanına yaqınlaşuçı militsionerlarğa ata başlağan. 3 militsioner häläk bulğan. Qayber mäğlümatlarğa qarağanda, desantçılar Çeçnyada bulıp qaytqan häm militsionerlarnıñ bronejilet kigänen belep, alarnıñ başlarına atqan. Atış waqıtında ber qaçqın soldat yaralanğan. Şunnan soñ anı zasadada utırğan iptäşe atıp tämam ütergän häm annan soñ üz-üzenä atqan.

Şulay itep, Semberdä başlanıp, Tatarstanda noqta quyılğan faciğada barlığı 10 ir-yeget häläk buldı. Vasil'yevo bistäsendä tuıp üskän Almaz Şağiyıvnıñ ike tapqır uğrılıqta ğäyeplänep mäxkämä aldına basqanı mäğlüm buldı. Xäzer Tatarstanda xoquq saqlaw oyışmaları wäkilläre xökemgä tartılğan keşe niçek Rusiä Armiäseneñ elitalı, saylap alına torğan ğaskärenä eläkkän, digän soraw quyalar.

Borınğı ber nikrutlar cırında «kitäm inde, kitäm inde, armiägä alalar, bäxete bulğan balalar öylärendä qalalar», dip cırlana ide. Äye, bäxetle balalar patşa zamanında da armiä xezmätennän qala torğan bulğan, bolar kübesençä xälle, baylar, säwdägärlär balaları bulğan. Sovet çorında bäxetle balalarnıñ isemlege çiklängän, tögäl itep bilgelängän ide. Armiädän yä studentlar, yä ata-anası qarawçısız qala torğan balalar, yä öylänep, başlı-küzle bulıp berniçä balalı ğailä başlığı qalırğa mömkin ide. Xäzerge zamanda armiädän qaluçı bäxetle balalar isemlege şaqtıy kiñäyde, qanuni nigezläre arttı. Aqça da, patşa zamanındağı kebek, küp närsäne xäl itä. Bu berkemgä dä ser tügel. Şuña kürä armiädän qaluçılar kübäyde, ä armiä üzgärmäde. Äle küptän tügel genä Qazanda mobilizatsiä planın ütäw öçen xärbi komissariatlardan qaçıp yörüçe yäşlärne militsiä xezmätkärläre belän cıyıp yörgännär ide. Ä inde plan ütägändä barısı da yarıy. Awıruı da, çirlese dä, xökemgä tartılğanı da.
XS
SM
MD
LG