Tatarstannıñ «Tügäräk östäl» dip atalğan säyäsi partiälär häm oyışmalar berlege Rusiäneñ konstitutsiä mäxqämäse qararı turında belderü yasağan. “Tügäräk östäl”çelär Marsel' Sälämov ğarizası buyınça qabul itelgän qararğa qatlawlı xislär kiçerä ikän. Oppozitsiädä bulğan bu törkemnär şundıy täqdimnär yasıy. Prezident wäkälätlären kimetep Däwlät Şurasına tapşırırğa, xökümätne Däwlät Şurasına bilgelärgä, parlamentnıñ 50 protsentın partiä isemlekläre buyınça saylarğa, saylaw ütkärgändä mäğlümat çaraların qullanğanda törle partiä wäkillärenä tigez mömkinlek birergä. “Tügäräk östäl”çelär Däwlät Şurası tiz genä yaña konstitutsiä qabul itsen dä, annarı üzen-üze taratıp yaña saylawlar ütkärergä mömkinlek birsen dip sanıy. Xäzergä äle Tatarstan Däwlät Şurası respublikanı üz qulı belän yuqqa çığarsın digän täqdim işetelmi.
«Azatlıq» radiosı öçen Qazannan Rimzil Wäli
«Azatlıq» radiosı öçen Qazannan Rimzil Wäli