Accessibility links

пәнҗешәмбе, 8 декабрь 2016, Казан вакыты 03:04

Xalıq sanın aluğa äzerlek bara


Xalıq sanın aluğa äzerlek bara

Rusiädä 2002 yılda xalıq sanın alu tiräsendä kilep çıqqan wazğıät tä tatar cämäğätçelegeneñ küñelen tırnap torğan ber borçu. Keräşennärneñ möstäqil millät bulıp xalıq sanın aluda qatnaşaçaqları inde xäl itelgän mäsälä sanala. Region.ru xäbär itüwençä, küptän tügel Rusiä xökümäteneñ Däwlät Dumasında tulı waqälätle wäkile uzdırğan kiñäşmädä Tatarstannan saylanğan Duma deputatları belän Rusiäneñ Etnologiä institutı wäkilläre arasında keräşennär xaqında bäxäs çıqqan. Tatarstan deputatları täqrarlawınça, barlıq keräşennär dä üzlären tatar dip atıy. Älege kiñäşmädä keräşen wäkillären dä kertep tözelgän maxsus komissiäne Tatarstanğa cibärergä qarar itelgän.

Sişämbe könne Ministrlar Kabinetında uzğan brifing ta Rusiädä xalıq sanın aluğa äzerlek çaralarına bağışlandı. Anı Respublika däwlät statistika komitetı räise Valeriy Kandilov alıp bardı. Xalıq sanın aluğa äzerlek eşläre inde ike yıl çaması bara ikän. Rayon çiklären, şähär uramnarı isemnären, yort nomerların barlaw eşläre başqarılğan inde. Şähärlärdä ber isäpläwçegä 420 keşe, awıl cirendä 320 keşe turı kilä. Tatarstan häm Başqortostan Rusiädä oyıştırılğan 16 töbäqära üzäklär arasında ayırım üzäk bulıp tora. Çönki alarnıñ xalqı küp. İsäp aluçılar itep studentlarnı, yuğarı uqu yort möğallimnären, şulay uq mäşgüllek waqıfında isäptä torğan keşelärne cälep itärgä uylıylar. İsäpçelärgä 19 eş köne öçen 1500 sum xezmät xaqı qaralğan.

Xalıq sanın alğanda bulaçaq töp problemalar da açıqlanğan. Ul isäp aluçılarnıñ fatirlarğa, yortlarğa kerä aluwı häm alarnıñ qurqınıçsızlığı. Keşelärgä täqdim itelä torğan anketada 16 soraw. Bu anketanı telefon aşa da tutırırğa mömkin. Xalıq sanın alğanda ayırım şäxeskä qağılışlı mäğlümätlärne ser itep saqlaw wäğdä itelä. Ä menä anketanıñ ışanıçlılığına garantiä birelmi. Çönki telämägän sorawğa cawap birmäskä dä mömkin. Brifingta xalıq sanın aluğa Rusiä xökümäte 4 milliard sum aqça totaçaq. Brifingta sorawlarğa cawap birgändä, älbättä, millätlär isemlege turında süz çıqtı. Valeriy Kandilov äytüençä, Tatarstan Däwlät Şurasınıñ xalıq sanın aluğa qarata möräcäğäte Rusiä citäkçlegenä citkerelgän. Älegä millätlär isemlege raslanmağan. Tatarstan xökümäte bu isemlekne 1989 yılda xalıq sanın alğandağıça qaldıru yağında. Anda millätlär isemlegendä tatarlar barı tik tatarlar, dip kenä atala. Bernindi seber tatarları da, keräşen tatarları da, mişärlär dä yuq.
XS
SM
MD
LG