Matbuğatta Tatarstanğa qarşı mäğlümät suğışı däwam itä

Soñğı waqıtta respublikağa qağılışlı mäğlümätlär belän tanışqanda şundıy tä'sir qala. Häm bu üzäk matbuğatta, İnternet säxifälärendä gena tügel, xättä Tatarstannıñ üzendä basıla torğan basmalarda da sizelä. Respublikanıñ töp qanunın Rusiä konstitutsion mäxqämäsenä birgän Marsel Sälämovnıñ militsiä xezmätkärläre tarafınnan ezärleklänüe turında, keräşennärneñ milli xäräkät liderın qulğa alu häm aña qarşı cinäyät eşe quzğatılu turında uquçılarğa häm tamaşaçılarğa äledän-äle citkerep toralar. Çınbarlıqta bu mäğlümätlärneñ kübese çamadan tış arttırıp kürsätelüe yäki döreslekkä turı kilmäwe xäbär taratuçılarnı ällä ni aptıratmıy buğay. Härxäldä, İnternetta häm Mäskäw yaqlı matbuğatta çıqqan mäğlümätlärne raslawçı yäki inqär itüçe tabılmıy.