Accessibility links

Кайнар хәбәр

Tatarstan mäktäplärendä latin imlasın kertü eksperimentı niçek bara?


Tatarstan mäktäplärendä latin imlasın kertü eksperimentı niçek bara?

Çärşämbe könne tarix fännäre doktorı Damir İsxaqov häm Däwlät Şurası deputatı Tufan Minnullin Mäskäwgä kittelär. Alar anda Rusiä xalıqları telläre turındağı qanunğa kertelgän tözätmälärne tikşeräçäk tügäräk östäl eşendä qatnaşırğa niätli. Anda, şulay uq, Däwlät Duması deputatları, Federatsiä sovetı äğzäläre, Mäskäwdäge etnologiä häm antropologiä intstitutı ğalimnäre qatnaşaçaq. Tikşereläçäk tözätmäneñ eçtälege: milli älifbalar barı tik federal' üzäktä, Däwlät Duması qararı belän genä üzgärtelä ala. Yäğni, bu tatarlarnıñ älifba üzgärtüenä qarşı maxsus kertelä torğan tözätmä. Şuşı initsiativa belän çığuçılar arasında 10 törle millät wäkilläre. Alar arasında Tatarstan deputatları Sergey Şaşurin häm Sälimxan Äxmätxanov. Läkin bu proeyktnı prezident administratsiäse äzerlägän, digän ğayre räsmi xäbärlär bar.

Şulay itep tatar telen latin imlasına qaytaru xaqındağı bäxäslär haman da tınmıy. Kiresençä, qızğannan-qıza bara. Menä şundıy qatlawlı wäzğıättä respublika mäktäplärendä tatar telen latin imlasında uqıtu eksperimentı niçek ütä soñ? Ğomümän, bu eksperiment däwam itäme, anıñ näticäläre nindi? Şuşı sorawlarğa «Azatlıq» radiosınıñ Qazan byurosı studiäsendä veteran uqıtuçı Zäkiä xanım Gömärova bolay cawap birde:

Eksperiment bara. Anda respublikanıñ 43 mäktäbe häm 10 pedagogik kölliäte qatnaşa. Xäzer inde latin imlasında tatar telen 3-nçe klasslarda uqıtalar. Östäwenä, latin imlasında uqıtu qayber mäktäplärdä fakul'tativ räweşendä dä alıp barıla. Ä Qazannıñ 95-nçe mäktäbendä bu däreslärdä tatar balaları ğına tügel, urıs millätennän bulğan uquçılar da şöğellänä. Bu däreslärdän ata-analar da bik qänäğät, çönki bu, berençedän, tatar telendä döres yazarğa häm uqırğa öyrätsä, ikençedän, mäktäptä birelä torğan çit tellärne üzläşterergä dä yärdäm itä.
XS
SM
MD
LG