Accessibility links

Кайнар хәбәр

Tatarstannıñ yaña Konstitutsiäse turında räsmi häm ğäyre räsmi xäbärlär


Tatarstannıñ yaña Konstitutsiäse turında räsmi häm ğäyre räsmi xäbärlär

Xäbärlärneñ räsmiläre dä, ğayre räsmiläre dä, mäğlümäti «çäkäläşülär» dä — barısı da soñğı könnärdä Tatarstannıñ yaña Konstitutsiäse tiräsendä äylänä. Mäğlüm ki, Konstitutsiä komissiäse yaña redaksiä proyektın tikşerüne tögälläp, anı Tatarstan Däwlät Şurası qaramağına tapşırdı. Däwlät Şurası prezidiumı yaña redaksiäne tikşerüne 28 fevralgä bilgeläde. Pänceşämbe könne räsmi mäğlümat çaralarında Däwlät Şurası prezidiumı qararları basıldı. 28 fevraldä ütäçäk 10-nçı plenar sessiäneñ kön tärtibenä 6 mäsälä kertelgän. Berençe bulıp, Tatarstan Prezidentınıñ Däwlät Şurasına «2002 yılda Tatarstannıñ eçke häm tışqı xäle» digän yullaması. İkençe mäsälä bulıp, Tatarstan Konstitutsiäsenä üzgäreşlär häm östämälär kertü turında qanun proyektı - berençe uqılışta.

Şulay itep, 10-nçı plenar sessiä xälitkeç bulaçaq. Tatarstan Konstitutsiäseneñ yaña tekstı älegä mäğlümat çaralarına taratılmasa da, xalıqqa citkerelmäsä dä, töp qanunnıñ töp nigezlämäläre saqlanıp qalğanlığı kön kebek açıq. Bu turıda räsmi räweştä Däwlät Şurası räise Färit Möxämmätşin belderde. Tatarstannıñ statusı, grajdannar xoquqları üzgärmi. Waqälätlär büleşü turındağı ike yaqlı kileşüdäge töp matdälär yaña Konstitutsiägä norma itep kertelgän. Yaña Konstitutsiäneñ iskesennän närsäläre belän ayırıluı da mäğlüm. Törle tikşerü, küzätü komitetı citäkçeläre, respublika prokurorın bilgeläw wäqäläte federal' üzäkkä tapşırıla. Yaña Konstitutsiä buyınça parlament daimi nigezdä eşläwçe 60 deputattan toraçaq. Boları räsmi xäbärlärdä äytelde.

Qayber ğayre räsmi çığanaqlar yaña redaksiäne tikşergändä, tağın nindi mäsälälär, problemalar turında süz barğanın ireşterä. «Звезда Поволжья» gazetası proyektnı tikşergändä, iñ töp problema bulıp 91-nçe matdä, däwlät başlığı turındağı matdäne tikşergändä kilep tudı, dip yaza. Federal' qanun buyınça Tatarstan Prezidentı başqaruçı xaqimiät başlığı da bulırğa tieş, yäğni premier-ministr wazifası beterelergä tieş. Şuña kürä yaña redaksiädä vitse-prezident wazifasın buldıru täqdime yasalğan. Kiñäşü barışında, bu oçraqta töp mäs'älä - kadrlar mäsäläse, Prezident apparatına küçäse açıqlanğan. Monnan tış, vitse-premier wazifası da soraw astına quyılğan. Näticädä, bu täqdimnän çigengännär. Tik menä premier-ministr wazifası qaldırılğan oçraqta, Rusiä qanunnarın yaqlawçı deputat Ştanin inde yaña Konstitutsiäne dä mäxkämägä birergä niätli ikän. Şulay itep, däwlät citkäçeläre mäxqämälärgä şiqäyätlär yasarlıq bulmasın, dip qayğırtsa da, bäxäs-nizaqlarğa säbäp tabuçılar tabıla.
XS
SM
MD
LG