Accessibility links

җомга, 9 декабрь 2016, Казан вакыты 05:09

Xacğa baruçılar Kiprdan yıraq kitä almağan


Xacğa baruçılar Kiprdan yıraq kitä almağan

Düşämbe, 18 fevral' könne, «Azatlıq» radiosınıñ Qazan byurosına Kiprdan şaltırattılar. Urta diñgezdäge şuşı utrawnıñ Larnaca şähärendä 380 Rusiä möselmanı menä inde 4-çe kön xacğa kitä almıyça integä ikän. Xacğa baruçılar arasında 79 keşe Tatarstannan, şulay uq Başqortostannan, Udmurtiädän häm başqa töbäklärdän. Alar barısı da xac säfärenä baru öçen törle Diniä näzärätlärenä möräcäğät itep, xäläl aqçaların tülägännär. Ämmä, «Saudi» turistik firması, şulay uq qayber başqa turizm häm aviatsiä kompaniäläre säyäxätne axırına citkerä almağan. Bu turıda xacğa baruçı Gäbderäüf äfände Gretsiä Kiprındağı Larnaca şähäreneñ «San-Remo» hotelennän telefon aşa «Azatlıq» radiosınıñ Qazan byurosına xäbär itte:

Bez, Mäskäwdän, Qazannan, Ufadan, Permnan, Tübän Novgorodtan häm Rusiäneñ başqa töbäklärennän xacğa baruçılar, Kiprdağı Larnaca şähärendä utırabız. Bezne iltergä oçqıç yuq. Barıbız da üz şähärlärendäge Diniä näzärätläre aşa aqça tüläp yullamalar alğan keşelär. Şuşı säfärne oyıştıruçı turistik firmanıñ oyışmağanlığı, eşneñ axırına qädär oyıştırmağanlığı arqasında kilep tuğan wazğıät inde bu. Bez Putin belän Şäymievkä möräcäğät ittek. Bälki alar bulışa alır.

Gabderäüf äfändeneñ Kiprdan bezgä xäbär itüenä qarağanda, xacğa baruçılar arasında ölkän yäştäge möselmannar da, sälämätlege qaqşağan qardäşlärebez dä bar. Düşämbe könne irtänge säğät 11-gä qädär Citdägä oçıp kitü ömete belän yäşägännär. Bez Tatarstan Diniä nazarätenä şaltıratıp älege säyäxät turında beleşergä tırıştıq. Mäğlümätlär ällä ni küp tügel. Çınnan da, Tatarstannan 79 möselman Mäskäwgä barıp Söğüd Gäräbstanına yulğa çıqqannar. Citdä aeroportına töşep utıru öçen oçqıçqa röxsät alu problemaları turında da äyttelär. İnde bu röxsätlär alınıp, xac qılırğa yulğa çığuçılar Citdägä barıp citärgä tieş ide. Ämmä, töştän soñ qabat Kiprdan telefon aşa äytelgän xäbärgä qarağanda, yulğa çığu ömetläre aqlanmağan. Ber turistik kompaniä ikençesenä 180 meñ dollar aqça küçerergä tieş bulğan, ämmä bu summanıñ yartısı diärlek tieşle urınğa barıp citmägän. Yäğni, üzläreneñ yul aqçaların tülägän möselmannar haman Larnacada qala birä.

Älege wäzğıät turında möselmannar Tatarstan prezidentı Mintimer Şäymievkä xat yullağan. Xäzergä Tatarstan citäkçelege älege xac säfäre öçen nindi öleş kertkän yäki nindi yärdäm kürsätä ala ikänlege turında äytä almıybız. Kilgän mäğlümätlär prezidentnıñ Tışqı elemtälär departamentına da cibärelde. Qayber räsmi bulmağan mäğlümätlärgä qarağanda, Tatarstannıñ Kiprdağı wäkile Rawil Niğmätcanov Rusiä möselmannarınıñ Citdägä kitä almıyça Larnacada utıruı belän qızıqsına. Düşämbe könne ul şuşı törkem belän oçraşırğa tieş ide.

Menä şulay, törle turistik häm aviatsiä kompaniäläre xalıqara säyäxätlär oyıştırğanda yış qına qatlawlı xälgä tarıy. Berniçä yıl elek «Aerostan» kompaniäse oçqıçı Äfğanstanğa cihazlar taşığan waqıtta äsirlekkä elägep, ber yıldan soñ ekipajnıñ qıyulığı arqasında kire Qazanğa qaytqan ide. Xac säfärenä bäyle kierenke xäl nindi kompaniälär qatnaşlığında kilep tuğan ikänlegen xäzergä äytmi torabız. Mäsälä tögälräk öyränelgännän soñ, mäğlümät çaraları xacğa barunıñ niçek qatlawlı ikänlegen bäynä-bäynä taratır. Ä xäzergä 380-läp Rusiä möselmanı xac başlanuğa izge möselman üzägenä barıp citä almaw qurqınçı aldında tora. Mäğlüm bulğança, xac qılu 19 fevral'dä başlana.
XS
SM
MD
LG