Accessibility links

пәнҗешәмбе, 8 декабрь 2016, Казан вакыты 11:04

Fännär Akademiäsendä çirattağı prezident saylawlar fänni ölkädä wäzğıätne üzgärterme?


Fännär Akademiäsendä çirattağı prezident saylawlar fänni ölkädä wäzğıätne üzgärterme?

Soñğı waqıtta, Tatarstannıñ häm tatar xalqınıñ ruxi, mädäni tamırlarına törle basımnar yasala. Tatarlarnı 4-5 törkemgä bülü, tatar älifbasınıñ yazmışın Mäskäwdä başqa millät wäkilläre qulları belän xäl itü turındağı qanun proektın äzerläw, Seber tatarların ber yaqqa, keräşen tatarların ikençe yaqqa, Başqortostanda yäşäwçe tatarlarnıñ çın milläten häm tarixın başqaça itep, bozıp kürsätergä tırışu räsmi xaqimiättän dä, ğälimnärdän, säyäsätçelärdän dä töple belem häm tögäl xäräkät täläp itä.

Elekke Minzälä öyäze, İleş, Dürtöyle, Çaqmağış, Tuymazı, Yañawıl, Täteşle, Baltaç, Boray rayonnarındağı tatarlarnıñ tarixı nindi? Alarnıñ nindi teldä söyläşüe, nindi mäktäplärdä balaların uqıtırğa teläwläre räsmi räweştä tanılamı? Qazandağı ictimağıy, fänni oyışmalar, ğälimnär, milli zıyalılar millättäşlärebezneñ xaq tarixın añlatıp birä alamı? Mondıy soraw belän törle oyışmalarğa häm bilgele şäxeslärgä möräcäğät itkäç, şundıy cawap alırğa mömkin. Tarixnı belüen beläbez, bernindi yalğannarğa bireşmibez dilär. Ämmä, tatar tarixınıñ här töbäktäge millättäşlärebezgä bäyle iñ ğadi säxifäläre äle kiñ cämäğätçelekkä taratılmağan ikän. 10 yıl elek açılğan Fännär Akademiäse, anıñ 3 tarmaq institutı, distälägän yuğarı uqu yortlarındağı kafedralar, fakul'tetlar üzläre belgänçä yäşäp, eşläp yatalar. Härqayda aqça citmäwgä zarlanalar. Ölkän yäşlärdäge aqsaqal ğälimnär qalın-qalın kitaplar çığarğannar, ä yäşräklär üz fikerlären däftär-käğäzlärgä terkäp yöri. Bälki şuşı atnada Fännär Akademiäsendä çirattağı prezident saylawları ütkärelgäç, ğälimnärneñ milli tarixqa häm etnografiägä waqıt häm iğtibar bağışlarğa mömkinlekläre bulır.
XS
SM
MD
LG