Accessibility links

шимбә, 3 декабрь 2016, Казан вакыты 18:42

Tatarstan möselmannarı Qorban bäyrämenä äzerlänä


Tatarstan möselmannarı Qorban bäyrämenä äzerlänä

Tatarstan xalqı ozın bäyräm yal könnäre aldında tora. Comğa Qorban bäyräme, 23 fevral' Watannı saqlawçılar köne ike yal könenä quşıldı. Qorban bäyräme bıyıl da, şöker, olılap, zurlap ütkärelä. Tatarstan möselmannarın Mintimer Şäymiev qotladı. Anda «möselmannarnıñ Allahı Täğäleneñ rizalığı öçen qorban kiterügä bagışlangan bu olı bäyräme mö’minnärne berläşterüçe iñ xörmät itelä torğan bäyräm. Ul İslam dinen totuçı xalıqlarnıñ yuğarı ruxi, äxlaqi sıyfatların, tarixi traditsiälären häm milli göref-gädätlären gäwdäländerä», digän yullar bar.

Tatarstan Diniä nazaräte, Qorban bäyräme uñayınnan Tatarstan möselmannarına «Gäräpçä Qorban bäyräme xötbäse», möfti Ğosman xäzrät İsxaqinıñ «Qorban ğäyete» wäğäzen häm Qorban ğäyete belän qotlawın tarattı. Anda mondıy yullar bar. «Möxtäräm cämäğät, totqan yulıbıznı dälilläp, Tatarstan cömhüriäte möselmannarınıñ İkençe qorıltae uzdı. Tatarstan mäxällärennän wäkillär, yıraq töbäklärdän qunaqlar ciıldı. Uzğan qorıltay berdämlekne tağın ber qat rasladı häm Rusiä Federatsiäse möselmannarı öçen dä qayğırtıp, näticä yasarğa ber säbäp buldı. Älxämdülilläh, Tatarstannı, Qazannı tanıylar—Allahı Täğälädän xezmätebezgä xäyerle kiläçäk sorıyq. Qorıltay aşa miña häm nazarätkä kürsätkän ışanıçığız öçen räxmät. Küñellärebezdä nindi genä izge teläk, izge niätlär bulsa, şul teläklärebezgä bergä ireşergä nasıyp äyläsen. Allahı Sübxänähü wä Täğälä itäğät ilä yäşärgä härberebezgä dä miässär qılsın. » Möfti Ğosman xäzrät İsxaqi Qorban ğäyete wäğäzen Bolğar mäçetendä uqırğa niätli. Comğa könne irtänge namaz 6-da, Ğäyet namazı irtänge 7.40-ta başlanaçaq. Qazannıñ barlıq mäçetlärendä dä Qorban çalu häm Qorbanğa xaywannar satu oyıştırıla. Bıyıl sarıq bäyäläre 1500-1800 sum çaması bulır, dip farazlana.

Azatlıq» radiosı öçen Qazannan Yunıs Ätnäle.
XS
SM
MD
LG