Accessibility links

дүшәмбе, 5 декабрь 2016, Казан вакыты 07:37

Qazan Qorbannı häm Watanni yaqlawçılar könen bäyräm itte


Qazan Qorbannı häm Watanni yaqlawçılar könen bäyräm itte

Qorban bäyrämen Qazanda häm Tatarstanda zurlap ütkärdelär. Bıyıl qorban çaluçılarnıñ sanı ğädättägedän kübräk buldı. Fäqirlärgä, ölkännärgä qorban iten taratu, qorban şulpasın awız itterü, ülgännärneñ ruxına doğalar qılu, tuğan-tumaçalarnı iskä alu näq milli ğöref-gädätlär quşqança ide.

Ä menä dini bäyrämneñ salmaq qına xärbilär bäyrämenä äwerelep kitüe berkemne dä ğäcäpländermi. 23 fevral' -- Watannı saqlawçılar köne bıyıl tağın da zurlap ütkärelde. Berençe tapqır ul räsmi yal köne dip iğlan itelgängä, düşämbe könne uzğan şimbä urınına yal itelde. Şähär xaqimiäte häm xärbi garnizon näq elekke zamannardağıça tantanalı kiçä ütkärde. Suğışqa baru, armiädä xezmät itü disäñ tatarlar da, başqortlar da iñ berençe saflarda, alğa atlığıp tora. Watannı saqlaw, armiägä baru — yegetlek digän propaganda öndämäläre, suğışta kürsätelgän batırlıqlar — barısı da bezneñ xalıq yazmışı. Brest kreposten saqlawçılarnıñ komandirı keräşen tatarı Petr Gavrilovtan başlap, Reichstagka iñ berençe bayraq qadawçı Ğazi Zahitovqa qädär, Ural-Seber töbäklärendä zavod-basularda eşläp frontqa teräk bulğan tatarlar häm alman äsirlegendä sovet ile patriotı bulıp qalğan Musa Cälillärgä qädär, bügenge tatar generalları, polkovnikları, soldatlarına qädär barısı da arıslanday keräşkän, watannı saqlağan. Xäzer inde ul watan bötenläy bulmasa da, sovetlar berlege cimerelsä dä bezneñ xalıq ğorurlana, quana, Räsäy telägänçä yäşämägän başqa illärne sügä. Äybät ütte Watannı saqlawçılar köne. Anı Watansızlar da, üz däwläten ğasırlar elek yuğaltuçılar da yaqın itä ikän.
XS
SM
MD
LG