Accessibility links

сишәмбе, 6 декабрь 2016, Казан вакыты 13:12

Federal üzäk belän töbäklär arasındağı mönäsäbätlärgä bağışlanğan oçraşu uzdı


Federal üzäk belän töbäklär arasındağı mönäsäbätlärgä bağışlanğan oçraşu uzdı

Sişämbe könne Qazannıñ Texnologiä universitetında federal' üzäkneñ sub’ektlar belän mönäsäbätlärenä bağışlanğan ber qızıqlı çara ütkärelde. İdelbuyı federal' okrugınıñ strategik ezlänülär üzäge wäkile häm Sergey Kirienkonıñ kiñäşçese kilä digäç, leksiä bulası urınğa äydäp baruçı mäğlümat çaraları möxärrirläre, federal' üzäkkä tabınıp yäşäwçe deputatlar, säyäsätçelär cıyıldılar. Leksiäne İnternetta on-line räweşendä kürergä bula ide. Läkin lektor Yefim Ostrovskiynıñ «Субъекты стратегирования: воля элиты общества» digän leksiäse bik tä fälsäfi bulıp çıqtı. Şuña kürä tıñlawçılar leksiädä äytelgän bilgelämälärne, fikerlärne üzlärençä yurap utırdılar. Ul süzne bik yıraqtan başladı. Yefim Ostrovskiy Qazanğa 10 meñ kilometr yul uzıp kilgän. Reys oçqıçı belän waqıtında kilep citä almayaçağın belgäç, ayırım oçqıç yallağan. Häm bu aña Mäskäwdä, MGUda uqığanda ber korpustan ikençe korpusqa küçkändä, taksi yallağanın xäterlätkän. Küräseñ, lektor zamanalarınıñ bik nıq üzgärgänenä işarä yasadı. Soñraq ul inde geopolitika dip söylänülär küptän iskerde, geoekonomika, geokul'tura digän töşençälär belän eş itärgä kiräk, dide. Rusiädä 10 yıllıq reformalar barışında xosusıy mänfäğätlärneñ üzäktän quuçı buluın, ä xäzer xosusıy mänfäğätneñ üzäkkä omtıluçığa äylänüe turında äytte. Federal' üzäkkä omtılıp, federal' üzäkkä tabınıp yäşäwçelär monı yaxşığa yuradılar. Läkin federal' üzäk säyäsätenä oppozitsiädä toruçılar da xafalanmasınnar. Äytik, Bötentatar ictimağıy üzäge. Bez azçılıqta, bezneñ belän isäpläşmilär, dip xafalanmasınnar. Yefim Ostrovskiy xäzerge cämğıättä üseşne, tärräqıätne azçılıq xäl itä, digän fälsäfi fiker äytte. Leksiä menä şundıyraq fälsäfädäge yaña terminnar, yaña yunäleşlärne añlatu ruxında bardı.

Sorawlarğa cawap öleşendä lektor konkretraq bulırğa wäğdä itsä dä, “Azatlıq” xäbärçeseneñ “Rusiädä gubernalaştıru bulamı?” digän sorawına “Bu soraw miña tügel” dip cawap birde. Başqa ber jurnalistnıñ “Rusiä öçen Tatarstan närsä ul?” digän sorawına cawap öçen lektor çara azağına xätle time-out aldı häm soñınnan ğına sorawnı tağın ber isenä töşergäç, auditoriägä kürsätep, “Это - вы”, dide. Şulay itep, leksiä ütä fälsäfi bulıp çıqtı. Sergey Kirienko kiñäşçese häm İdelbuyı federal' okrugınıñ strategik ezlänülär üzäge xezmätkäre 10 meñ çaqırım cir uzıp, maxsus oçqıç yallap, leksiäne tıñlawçı auditoriäneñ 5 % ğına anıñ närsä äytergä telägänen añlayaçağın belä torıp kilgän, bulıp çıqtı. Rus ädäbiäte klassiğı äytkändäy, “умом Россию не понять'” dip äytergä genä qala.
XS
SM
MD
LG