Accessibility links

шимбә, 3 декабрь 2016, Казан вакыты 16:54

Baqıy Urmançığa 105 yıl tuluğa bağışlanğan kürgäzmälär açıldı


Baqıy Urmançığa 105 yıl tuluğa bağışlanğan kürgäzmälär açıldı

Şuşı könnärdä Tatarstanda kürenekle rässam Baqıy Urmançınıñ 105 yıllıq yubileen bäyräm itälär. Xäyer, tatar xalqınıñ bu olı ädibe rässam ğına tügel, ä sınçı, tatar milli sınlı sänğätkä nigez saluçı, näqışçı, grafik ta bit äle. Şul uq waqıtta, ul sınlı sänğätneñ portret, natyurmort, kalligrafiä, şamail kebek tarmaqlarında iskitkeç talantqa iä bulğan şäxes ide. Baqıy Urmançı -- üz icatında tatar xalqınıñ tarixın, milli kiemnären, açı yazmışın bik zur tögällek häm ostalıq belän gäwdäländergän keşe. Anıñ äsärläre xalqıbıznıñ yazmışın, qatlawlı tormışın, tuğan yaqlarnıñ güzäl tabiğäten, xalıqnıñ üzen ğäcäyep osta tasvirlıy. Rässäm icatınıñ zur ähämiätkä iä tağın ber yağı -- rässäm häm sınçı bularaq ul Ğabdulla Tuqaynıñ üzen, aniñ zamandaşların, şağıyrneñ ädäbi obrazların mäñgeläşterü östendä ğömer buyı eşlägän şäxes.

Yubiley uñayınnan Qazannıñ berniçä muzeenda rässämnıñ şäxsi kürgäzmäläre eşli. Mäsälän, Ğabdulla Tuqay muzeenda Baqıy ağanıñ moñarçı berqayda da kürsätelmägän, bernindi al'bomnarğa da kermägän, rässämnıñ tormış iptäşe Flora xanımnıñ ğailä arxivında saqlana torğan 30-ğa yaqın grafikası, kürenekle şäxeslärneñ sınnarınıñ fotosürätläre, soñğı yıllarda töşkän fotoları, aña büläk itelgän häm qayber şäxsi äyberläre quyılğan. Monda kürsätelä torğan grafikalar nigezdä Tuqaynıñ «Şüräle» häm «İsemdä qalğannar» äsärlärenä bağışlanğan. Tatarstannıñ sınlı sänğät muzeendağı kürgäzmä isä, kübräk Urmançı icatınıñ Urta Aziädäge çorına bağışlanğan. Şulay uq anda Därdmänd şiğırlärenä eskizlar, Tuqaynıñ «Kisekbaş» äsärenä bağışlanğan räsemnär dä urın alğan. Baqıy Urmançe rässäm, sınçı ğına tügel, ä talantlı cırçı, şağıyr dä ikän. Anıñ repertuarında äle moñarçı xalqıbız işetmägän cırlar da saqlana ikän. Tanılğan cırçı İdris Gäziev xäzerge waqıtta Baqıy ağanıñ ğailä arxivında saqlanğan şuşı cırlarnı tamaşaçılarğa citkerü niäte belän yöri. Ul bu cırlarnı cıyıp, başqarıp, «Cırlı, moñlı sınçı Urmançı» digän fil'm çığarırğa uylıy ikän.
XS
SM
MD
LG