Accessibility links

пәнҗешәмбе, 8 декабрь 2016, Казан вакыты 09:00

Tinçurin teatrında ütkän Aydar Xälimneñ icat kiçäsendä Şäymievneñ qotlawı da yañğıradı


Sişämbe kiçendä Kärim Tinçurin isemendäge teatr binasında şağıyr häm cämäğät eşleklese Aydar Xälimneñ 60 yıllıq yubileena bağışlanğan muzıkal' kiçä ütte. Bu kiçäneñ räsmi iseme — «Bez isän!». Ser tügel, Aydar Xälim uzğan yılnıñ yaz könnärendä üzeneñ ber mäqäläsendä «Tatar xalqınıñ betüe fakt» digän ayanıçlı fiker äytkän ide. Başqortostannıñ Miäkäy rayonında tuıp-üskän, Qazan universitetın tämämlağan, Tübän Qamada, Ufada, Çallıda jurnalist, näşıyr' häm möxärrir bularaq ozaq yıllar eşlägän, milli xäräkättä üzen iñ qaynar köräşçelärneñ berse itep kürsätkän Aydar Xälim icatta da, tormışta da milli tereleş häm inqıyraz tartqalaşı simvolına äwerelde. 90-nçı yıllar başında Ufada Başqortostan tatarları mänfäğätlären yaqlap säyäsi açlıqta utıru, perestroyka başlanğanda Ural tatarlarınıñ açı yazmışı turında kitap yazu häm anı bötensoyuz matbuğatında, ayırım alğanda «Drujba narodov» jurnalı bitlärendä bastıru, Aydar Xälimneñ qaynar dusların da, säyäsi doşmannarın da bitaraf qaldırmadı. Anıñ turında «Kak stat' ekstremistom» dip atalğan dokumental' fil'm töşerelep, televizor ekrannarınnan kürsätelde. Millät häm şigriät yulında köräş, imperiä cinayätlären faş itü, törle däräcädäge saylawlarda qatnaşu, Çallıda «Arğamaq» jurnalınıñ baş möxärrire bulu, Milli mäcles räise itep saylanu, qırım tatarların, çeçennarnıñ irek öçen köräşen yaklaw Aydar Xälim isemen böten dönyağa tanıttı. Xäzer Tatarstan konstitutsiäse Mäskäw basımı astında üzgärtelgän könnärdä «Bez barıber isän» digän şiğar astında kiçä ütkärü üze ber zur mädäni häm säyäsi çarağa äwerelde.

Bu kiçä ädäple häm zäwıqlı itep oyıştırılğan ide. Anda şigriät, milli muzıqa, tanılğan ädiplärneñ sallı fikerläre xaqimlek itte. Tatarstan yazuçılar berlege räise Foat Ğalimullin icatçılar isemennän Aydar Xälimne yubilee belän qotladı häm yubilyarğa Tatarstan prezidentı Miñtimer Şäymievneñ qotlaw xatın uqıp birde. Cämäğätçelek Aydar Xälimneñ Tatarstan xaqimiäten häm räsmi citäkçelärne armıy-talmıy, qayber waqıtta xättä bik kisken süzlär qullanıp tänqitlägänen yaxşı belä. Läkin Miñtimer Şäymiev monıñ öçen ädipkä açu-üpkä saqlamawın beldergän. Prezident, Aydar Xälimneñ qaynar xisläre qaywaqıtta yarlarğa sıyışıp betmäsä dä, anıñ tatar milläteneñ ruxın, anıñ köräşen häm isänlegen yaqlawda xezmätlären bersüzsez tanıy, aña izge teläklär teli.

Kiçäneñ axırında Aydar Xälim şiğer uqıdı, ikençe dönya suğışı waqıtında balalıq tä'sirläre belän urtaqlaştı häm babası cırlağan ber mäğnäle cır başqarğaç mondıy süzlär äytte:

Min Tatarstan citäkçelegenä, mädäniät ministrlığına, milli cämäğätçelekkä, Tinçurin häm Kamal isemendäge teatrlarına bu kiçäne oyıştıruda bulışlıq kürsätkän öçen bik räxmätlemen. Şulay uq min üzemneñ räxmätläremne Tatarstan prezidentı Miñtimer Şäymievkä citkeräsem kilä. Miña şundıy qotlaw xatı yazıp cibärü öçen qıyulıq kiräk. Yeget ikän! Räxmät aña.

Sişämbe häm çärşämbe könnärendä Tatarstanda menä şundıy waqiğalar buldı. Ä pänceşämbe könne, 28 fevral'dä, Tatarstan Däwlät Şurasınıñ plenar sessiäse ütäçäk. Anda respublika prezidentınıñ deputatlarğa Yullaması qaralaçaq, şulay uq respublika konstitutsiäsenä tözätmälär kertü turında qatlawlı mäsälälär tikşereläçäk. Bu utırış respublika radiosı häm televideniäse aşa turıdan-turı kürsätelergä tieş. Deputatlar moña qarşı bulmas, möğayın.

«Azatlıq» radiosı öçen Tatarstan xäbärläre belän Qazannan Gölnaz İlgizär
XS
SM
MD
LG