Accessibility links

сишәмбе, 6 декабрь 2016, Казан вакыты 03:58

“Tatarstan Konstitutsiäsenä östämälär häm üzgäreşlär kertü turındağı” qanun proektına mäğlümat çaralarında reaksiä


“Tatarstan Konstitutsiäsenä östämälär häm üzgäreşlär kertü turındağı” qanun proektına mäğlümat çaralarında reaksiä

“Tatarstan Konstitutsiäsenä östämälär häm üzgäreşlär kertü turındağı” qanun proektı, xäbär itkänebezçä, cämäğätçelek tarafına tikşerü, täqdimnär kertü öçen tapşırıldı. Berençe reaksiä säyäsi temalarğa yazuçı jurnalistlar tarafınnan buldı. «Новая газета»nıñ Qazandağı korrespondentı Boris Bronştein “Быль в глаза” digän mäqäläsen “Rusiä zur, ämma Tatarstan anda sımıy”, dip başladı. Ul elekke Konstitutsiäneñ häm yaña redaksiäneñ respublika statusın bilgeläwçe töp maddäsen çağıştıra. Konstitutsiäneñ yaña redaksiäsendä “suveren däwlät, xalıqara xoquq subyektı” digän bilgelämälär bulmasa da, anda “Tatarstan Rusiä Federatsiäseneñ tulı xoquqlı subyektı” diyelsä dä, şul uq waqıtta Tatarstan Rusiä eçendä tügel, ä Rusiä Federatsiäse Konstitutsiäse, Tatarstan Respublikası Konstitutsiäse häm Rusiä Federatsiäse belän Tatarstan arasındağı waqälätlär büleşü turındağı şartnamä nigezendä Rusiä Federatsiäse belän berläşkän däwlät bulıp çığa, dip “törtterep” yaza. Şulay itep, Boris Bronştein Tatarstan tağın küzgä tuzan-töten cibärä, dip işarä yasıy. Ul yaña redaksiädä “federatsiä subyektı” digän cirne Mäskäwgä, ä “Rusiä belän berläşkän” digän öleşne bäysezlek öçen köräşüçelärgä kürsätergä bula, dip yaza.

“Вечерняя Казань” gazetası berençe bitendä “Клонирование по-татарски. Политическая география Республики Татарстан” digän mäqäläsendä Konstitutsiäneñ yaña readksiäsendä 67-nçe maddä nigä kiräk ide digän soraw quya. Älege maddädä respublikanıñ administrativ-territoriä berämlekläre kiterelä. “Вечерняя Казань” Tatarstannı şundıy berämleklärgä bülenüen tatarlar mänfäğäten alğa sörü säyäsäte dip bäyäli. Çönki rayonnarda tatarlar küpläp yäşi, dimäk, rayonnar sanı küp bulğan sayın tatar deputatları kübräk saylanu ixtimalı arta. Şuña kürä 90-nçı yıllar başında yaña rayonnar oyıştıru, ere rayonnarnı bülgäläw säyäsäte alıp barılğan. Xäzer wazğıät prinsipta üzgärde. Respublikanı waqlawdan kilgän östenlek mäxqämä qararları belän yuqqa çığarıldı. İke palatalı parlament tözergä tırışu da barıp çıqmadı, dip yaza “Вечерняя Казань”. Şulay itep, Tatarstan Konstitutsiäsen Rusiänekenä täñgälläşterü belän känäğätsez qaluçılar da belende. Xäyer, yaraqlaşu çiktän aşıp kitmäsen, dip borçıluçılar Tatarstan böten Rusiädä sibelep yäşägän tatarnıñ milli-mädäni märkäze bulıp qalsın diyuçelär dä üz fikerlären, üz teläklären işetterdelär häm işetterälär. Şul uq Boris Bronştein şul uq mäqäläsendä BTİÜneñ Tatarstan Konstitutsiäsenä qağılmasqa, üzgärtmäskä digän taläplärendä nıq toruın iskä ala.
XS
SM
MD
LG