Accessibility links

пәнҗешәмбе, 8 декабрь 2016, Казан вакыты 03:25

Miñtimer Şäymiev Tatarstannıñ häm tatar xalqınıñ kürenekle xatın-qızları belän oçraştı


Tatarstanda inde yaqınlaşıp kilüçe 8 mart -- Xatın-qızlar könen bäyräm itä başladılar. Härber diärlek oyışmada, şirqät'tä güzäl zatlarnı qotlıylar, alarğa büläklär birälär. Bügen, çärşämbe könne, Salix Säydäşev isemendäge Zur konsertlar zalında Tatarstan prezidentı Miñtimer Şäymiev respublikanıñ kürenekle, tanılğan xatın-qızları belän oçraşıp, alarnı 8 mart bäyräme belän qotladı, alarğa büläklär tapşırdı. Menä xäzer 6 yıl inde prezident belän xatın-kızlar oçraşuında respublikanıñ iñ zatlı artistları säxnädä çığış yasıy, berniçä nominatsiä buyınça «Yıl xatın-qızı» häm xatın-qızlar bigräk tä xörmät itkän irlär bilgelänep, alarğa maqtaw tasmaları bäylänä häm diplomnar, büläklär tapşırıla.

Xatın-qızlar bäyräme xörmätennän oyıştırılğan bıyılğı oçraşunıñ üzençälekläre nindi buldı soñ? Qazannıñ iñ zatlı zalında ütä torğan şuşı mäcleskä çaqırıluçılarnıñ isemlegenä elägü öçen kiyerenke köräş bardı. Ä konsert programmasında çığış yasawçı artislar bäygese berniçä atna elek başlanıp, soñğı könnärgä qädär däwam itte. Prezident qarşına bäyrämgä barırğa teläüçelär Tatarstanda da, başqa töbäklärdä dä küp ikän. Bu saylanu uyını gädättägeçä bulsa, yäğni rayonnar, şähärlär häm töbäklär delegatsiäläre oyıştırılıp, Qazanğa cibärelsä, konsert häm mäclesneñ eçtälege beraz üzgäräk buldı. Miñtimer Şäymievneñ çığışı häm büläklär tapşıru ike säğättän artıq däwam itkän konserttan soñ ğına buldı. Häm konsertta nigezdä professional' artistlar bötenläy diärlek çığış yasamadı. Barı tik finalda ğına Tatarstannıñ cır, biyü ansamble millätlär üseşe häm duslığın çağıldırğan kompozitsiä kürsätte. Ä başqa nomerlar belän Tatarstannıñ törle şähärlärendä häm rayonnarında yäşäüçe talantlı balalar çığış yasadı. Ul xalıq riwayäte «Saq-Soq» bäyeten xoreografiä alımnarı belän kürsätüdän başlanıp kitte. Tatarstannıñ muzıka mäktäpläre, uçileşçaları uquçıları, tatar häm rus fol'klor törkemnärendä qatnaşuçılar respublikanıñ sänğäten dönyaküläm däräcädä kürsätergä omtıldılar. Alar arasında xalıqara häm Bötenrusiä muzıka, sänğät bäygelärendä ciñep çıqqan balalar da küp buldı. Qazaxstannıñ Semipalat şähärennän kilgän Dias Mursaliev isemle keçkenä malay «Min djazmen» digän cırı belän tamaşaçılarnı şaqqatırdı. Konsertta bötenläy säyäsät bulmadı diärlek. Barı tik yäş KVN törkemeneñ çığışında ğına, bezneñ tatar xalqın tiptärgä, mişärgä, keräşengä bülälär dip iğlan itkännän soñ, şayan häm tapqırlar arasınnan tübätäy kigän qara tänle, çın negr yegete alğa çığıp, tatar Afrikada da tatar inde ul, dip cawap birgäç, zalda utıruçılar räxätlänep kölde häm görläşep qul çaptı.

Prezident Miñtimer Şäymiev üzeneñ çığışında çittä yäşäwçe tatarlarğa, döresräge Qazanğa çaqırılğın tatar xatın-qızlarına da süzlär taptı:

Qäderle xatın-qızlar! Min sezne çın küñeldän şuşı bäyrämegez belän täbriklim. İñ izge teläklär sezgä. Barığızğa da bik zur räxmät!

«Yıl xatın-qızları» arasında «Yöräge härçaq xalıq belän» digän nominatsiädä Başqortostanda yäşäüçe tanılğan cırçı, Rusiäneñ xalıq artistkası Färidä Qudaşeva da maqtawlı isemgä layık buldı. Tatarstan häm Başqortostanda, ğomümän tatar dönyasında iñ tanılğan xatın-qızlarnıñ berse -- Färidä Qudaşeva säxnädän menä nindi süzlär äytte:

Qazanğa kilgändä min haman dulqınlanıp, sezne sağınıp kiläm. Bu yulı da şulay buldı. Min sezne barığıznı da bäyräm belän täbriklim. Sezgä uñışlar, isänlek, duslıq, tatulıq telim. Räxmät sezgä!

Bu cıyınnı respublika xökümäte häm «Tatarstan xatın-qızları» ictimağıy oyışması ütkärä. Xatın-qızlar belän oçraşuda prezidentnıñ tormış iptäşe Säkinä xanım, Däwlät Sovetı räise Färit Möxämmätşin, anıñ xäläl cefete Luiza xanım, şähär başlığı Qamil İsxakov häm anıñ xatını Fähimä xanım belän berrättän Amerika Quşma Ştatlarınıñ Rusiädäge ilçese Alexander Vershbownıñ tormış iptäşe Lisa Vershbow da qatnaştı. Anı tamaşaçılarğa täqdim itkännän soñ, säxnädä cırçı bala matur itep ingliz telendä cır başqardı.
XS
SM
MD
LG