Tatarstan Prezidentı Mintimer Şäymiev Amerikanıñ Rusiädäge ilçese Alexander Vershbow belän oçraştı…

7 mart könne Qazan Kremlendä Tatarstan Prezidentı Mintimer Şäymievneñ Amerika Quşma Ştatlarınıñ Rusiädäge ğadättäntış häm tulı wäqälätle ilçese Aleksandr Verşbou belän oçraşuı buldı. Oçraşuda Amerika yağınnan ilçeneñ maxsus yärdämçese Sintia Doel, Amerika ilçelegeneñ säyäsi bülege xezmätkäre Vincent О’Brain, Tatarstan yağınnan Prezident apparatı citäkçese Äğzam Göbäydullin, Tatarstan Prezidentınıñ xalıqara mäsäläläre buyınça kiñäşçese Timur Akulov, säwdä häm tışqı iqtisadıy xezmättäşlek ministrı Xafiz Salixov, Prezidentnıñ matbuğat üzäge citäkçese İrek Mortazin häm ike yaqtan da tärcemäçelär qatnaştılar. Xäyer, tärcemäçelär yärdäme kiräk bulmadı, diärlek. Alexander Vershbow yaxşı ğına rusça belä ikän. Mintimer Şäymiev kereş süzendä monı iskä aldı, şulay uq Amerika Quşma Ştatlarınıñ elekke ilçeläre belän dä tanış buluın, alar belän aralaşuın äytep kitte.